Berisha në konferencën e sotme për shtyp
Kreu i PD, Sali Berisha akuzon SPAK-un për manipulim të thirrjes zyrtare në lidhje me 21 janarin, ndërsa Prokuroria e Posaçme thekson se i ka nisur ftesë Berishës me 3 dhe 9 nëntor.
Përplasja mes Sali Berishës dhe SPAK-ut është intensifikuar sot, pasi ish-kryeministri akuzoi Prokurorinë e Posaçme se ka mashtruar lidhur me thirrjen për t’u paraqitur për hetime. Në një konferencë shtypi, Berisha hodhi poshtë çdo pretendim se ka marrë njoftim zyrtar, duke e quajtur veprimin një lojë politike të orkestruar.
“Pse duhet të marrësh të mirëqenë mashtrimin që bën Skapi? Nëse thonë se ma kanë dërguar dhe unë nuk e kam pranuar, janë mashtrues ordinerë. Unë kam njerëz në pallat dhe në seli që marrin postën me firmë. Të nxjerrin firmën po ta kem marrë,” deklaroi ai. Berisha shtoi se as banesa dhe as selia e PD nuk kanë marrë zarf, duke ironizuar se “e paska marrë Taulanti me pesë mbiemra”, duke iu referuar Taulant Ballës në lidhje me pretendimin e SPAK se thirrja është dërguar në Parlament.
Berisha e cilësoi mënyrën e njoftimit si të paligjshme, duke theksuar se institucionet nuk funksionojnë me njoftime mediatike, ndërsa akuzoi drejtues të SPAK-ut për lojëra të turpshme dhe banale.
Nga ana tjetër, SPAK publikoi një reagim zyrtar, ku sqaron se thirrjet për Berishën janë dërguar në të gjitha adresat përkatëse, përfshirë banesën, Partinë Demokratike, Kuvendin e Shqipërisë dhe adresën zyrtare të emailit. Sipas Prokurorisë së Posaçme, zarfat e dërguar në banesë janë kthyer me shënimin se “rojet janë autorizuar të mos marrin asnjë zarf”, ndërsa Kuvendi ka njoftuar se stafi politik i grupit parlamentar të PD-së ka refuzuar marrjen e njoftimit.
“Deri tani janë dërguar dy urdhër-thirrje përmes shërbimit të postës shqiptare, më datë 3.11.2025 në adresën e banesës (për t’u paraqitur në SPAK në datë 7.11.2025) dhe në datën 7.11.2025, në adresën e banesës, Partisë Demokratike dhe Kuvendit (për t’u paraqitur në datën 14.11.2025).
Urdhër-thirrja e parë, e dërguar në banesë më datë 3.11.2025, është kthyer mbrapsht në Prokurorinë e Posaçme, me shënimin:
“Rojet janë autorizuar të mos marrin asnjë zarf.”
Pas këtij konstatimi, Prokuroria e Posaçme ka vijuar me dërgimin e urdhër-thirrjes në tre destinacionet (Banesë, Partia Demokratike dhe Kuvend) më datë 07.11.2025.
Më datë 09.11.2025, është refuzuar marrja e zarfit të dërguar në banesë, ndërsa më 12.11.2025 Shërbimi i Burimeve Njerëzore dhe Trajtimit të Deputetëve në Kuvendin e Shqipërisë ka njoftuar se marrja në dorëzim e njoftimit është refuzuar nga stafi politik i grupit parlamentar të Partisë Demokratike.
Përmes shkresës është sqaruar gjithashtu se njoftimi për urdhër-thirrjen është dërguar edhe në adresën zyrtare të emailit:
sali.berisha@parlament.al, më datë 10.11.2025”, thuhet në njoftimin e SPAK.
SPAK theksoi se procesi i njoftimit është kryer sipas procedurave ligjore dhe se do të vijojë me hapat e tjerë të parashikuar nga legjislacioni në fuqi. a.b
