Rama dhe Gonzato në konferencë për shtyp
Kryeninistri Edi Rama nuk lejoi sot pyetje në lidhje me skandalin e tynelit të Llogarasë gjatë konferencës së përbashkët me ambasadorin e BE-së në Tiranë, Silvio Gonzato.
Ai bllokoi gazetaren e Syri tv, Ambrozia Meta, të bëjë pyetje.
Gazetarja po drejtonte një pyetje në anglisht për çështjen e zëvendëskryeministres Belinda Balluku, e cila është marrë e pandehur nga SPAK në lidhje me hetimin për tunelin e Llogarasë, por Rama e ndërpreu dhe e mbylli menjëherë konferencën për shtyp.
Pyetja e Metës ishte:
“A do të vazhdojë Belinda Balluku të qëndrojë në zyrë megjithëse është marrë e pandehur nga SPAK?”, raporton syri tv.
Kryeministri u përgjigj shkurt se pyetjet duhet të jenë për raportin, edhe pse vetë raporti i Komisionit Europian vë në dukje korrupsionin në nivelet e larta të qeverisë dhe ndikimin e tij në procesin e integrimit.
Në raportin vjetor të Komisionit, thuhet se Shqipëria ka bërë “progres të kufizuar” në përmbushjen e standardeve të BE-së për lirinë e shprehjes, ndërsa vendi “mbetet në një nivel të moderuar përgatitjeje” në këtë fushë. Komisioni thekson gjithashtu se qeveria shqiptare nuk ka zbatuar rekomandimet për forcimin e lirisë së medias gjatë tre viteve të fundit.
Pas këtij episodi ka reaguar kryetari i Partisë Demokratike, Sali Berisha, i cili e quajti veprimin e Ramës një shembull të qartë të censurës politike.
“Rama nuk lejon pyetje për Ballukun dhe tunelin e Llogarasë! Kjo është forma më staliniste e kontrollit mbi medien”, deklaroi Berisha.
Ai shtoi se veprimi i kryeministrit tregon “shkallën e frikës dhe kontrollit të tmerrshëm që regjimi i tij ushtron mbi gazetarët dhe pronarët e mediave”, ndërsa e cilësoi konferencën me BE-në si “më të turpshmen në 32 vitet e pluralizmit”.
Sipas tij, rasti i gazetarit të ndaluar tregon “mbylljen e gojës së medias kritike”, ndërsa ai akuzoi Ramën se “është përgjegjës direkt për aferën e tunelit të Llogarasë, që përfaqëson një nga vjedhjet më të mëdha me fondet publike”. a.b
