Janë publikuar ne disa media online pjesë të tjera nga dosja e tunelit të Llogarasë, një prej hetimeve më të mëdha që po zhvillon SPAK për abuzime me tendera publikë në sektorin e infrastrukturës. Në këtë dosje, si e pandehur është marrë edhe zëvendëskryeministrja dhe ministrja e Infrastrukturës, Belinda Balluku, së bashku me disa zyrtarë të tjerë të lartë.
Në biseda dalin në pah komunikime të shumta mes Ballukut dhe ish-kreut të Autoritetit Rrugor Shqiptar, Evis Berberi, të zhvilluara përmes mesazheve telefonike. Në to spikasin vendime për anulime tenderash dhe udhëzime për mënyrën e shpalljes së procedurave.
Sipas dosjes, bisedat janë zbardhur nga aparati celular “BlackBerry” i sekuestruar Evis Berberit, prej të cilit janë nxjerrë qindra komunikime me ministren.
Pjesë nga bisedat e zbardhura:
26 janar 2021
Belinda Balluku i shkruan Berberit:
“Një pyetje. Kemi ndryshuar ne tek tuneli eksperiencën e objekteve të ngjashme nga 5 vite në 3?”
Berberi përgjigjet:
“Kërkoi Pëllumbi të jetë 3 nga 5 vitet e fundit.”
Balluku vijon:
“Po pse? Kush e bëri kërkesën në KPP?”
Në vijim të komunikimit, Berberi shpjegon se ndryshimi është bërë në përputhje me VKM, por shton se ishte diskutuar paraprakisht me disa zyrtarë të tjerë.
5 mars 2021
Berberi njofton Ballukun:
“Më mori Gysi (Ergys Verdho) për t’u mbledhur nesër për dokumentet e tunelit se po i kalon koha.”
Balluku i përgjigjet:
“Por kalo pak këtej.”
17 mars 2021
Balluku pyet:
“Po tuneli? E mbyllët?”
Berberi i përgjigjet:
“Jo, është rëndë. Flasim live, mos shkruajmë.”
Në këtë bisedë, Balluku e udhëzon:
“Mendoj ta anullojmë. Skualifikoji të gjithë.”
Berberi pranon:
“Jam mëse dakord. E kemi një problem që s’më kuadron.”
18 mars 2021
Balluku kërkon anulimin e menjëhershëm të procedurës:
“Po si i ke lajmëruar të tjerët për anulimin? Mbylleni sot me urgjencë.”
28 maj 2021
Në një mesazh më të gjatë, Balluku i shkruan Berberit:
“I dashur Visi, marrëdhënia jonë ka kaluar shumë ulje-ngritje, por këtë herë po të jap diçka nga e cila varet e ardhmja ime dhe jotja. Dua ta marrësh shumë seriozisht… Hermetizëm, asnjë takim, asnjë premtim. Mos më zhgënje.”
SPAK thekson se vetëm tre ditë pas këtij komunikimi, Berberi u emërua zyrtarisht drejtor i përgjithshëm i ARRSH-së, më 31 maj 2021.
Shtator 2021
Në komunikime të tjera përmes aplikacionit “Signal”, dy zyrtarët diskutojnë për ofertat e tenderit.
Balluku: “Po oferta?”
Berberi: “Kinezi 185 milionë euro, Limak 186 milionë, Inter 170 milionë, Albbuilding 158 milionë.”
Balluku: “Qenkemi shkëlqyer, me pak fjalë.”
Më 1 tetor 2021, Berberi i shkruan:
“Për pak e nxjerr tunelin.”
Balluku i përgjigjet:
“Prit t’i çoj fjalën atij kur*ës që më kërcënon me SMS.”
Pak orë më pas, Berberi njofton:
“Tuneli u nxorr sapo.”
