Erion Veliaj ka ripërsëritur dëshirën për të marrë pjesë personalisht në seancën publike të datës 31 tetor 2025, që do të zhvillohet në ambientet e Gjykatës Kushtetuese. Seanca do të shqyrtojë kërkesën e tij për shpalljen si antikushtetues të dekretit të Presidentit të Republikës, Bajram Begaj, me të cilin u caktua data 9 nëntor për zhvillimin e zgjedhjeve të reja në Bashkinë e Tiranës.
Prania e Veliajt në gjyq është konfirmuar më herët edhe nga avokatët e tij.
Gjykata Kushtetuese i ka kërkuar Drejtorisë së Përgjithshme të Burgjeve të marrë të gjitha masat e nevojshme për transportimin dhe sigurinë e personit të paraburgosur, Erion Veliaj, në ambientet e Gjykatës Kushtetuese ditën e seancës.
Nëse Gjykata vendos rrëzimin e dekretit, Erion Veliaj vijon të mbetet me statusin ligjor të kryetarit të Bashkisë së Tiranës në detyrë.
Njoftimi i Gjykatës Kushtetuese/ “Në përgjigje të interesit të mediave dhe në kuadër të transparencës publike, Gjykata Kushtetuese bën me dije se, bazuar në nenet 21 pika 1 dhe 38, pikat 1 dhe 2 të ligjit nr. 8577, të ndryshuar, me shkresën nr. 28(E)2025 Regj.Them, datë 09.10.2025, është njoftuar kërkuesi Erion Veliaj për datën dhe orën e zhvillimit të seancës plenare publike më 31.10.2025.”
Gjykata njofton se me shkresën e datës 13.10.2025 i është drejtuar Drejtorisë së Përgjithshme të Burgjeve për marrjen e masave të nevojshme në rast se Veliaj do të shprehte dëshirën për të marrë pjesë personalisht në seancë.
Pas shprehjes së këtij vullneti më 20.10.2025, Gjykata Kushtetuese ka njoftuar edhe Prokurorinë e Posaçme kundër Korrupsionit dhe Krimit të Organizuar (SPAK).
