Kreu i grupit parlamentar të Partisë Demokratike, Gazment Bardhi, ka reaguar ashpër këtë të premte lidhur me zhvillimet e fundit në SPAK, duke deklaruar se Zëvendëskryeministrja dhe Ministrja e Infrastrukturës, Belinda Balluku, pritet të merret e pandehur në një nga çështjet që po hetohen ndaj saj.
Në një deklaratë publike, Bardhi e cilësoi Ballukun si “zyrtaren më të korruptuar të shtetit shqiptar në këto 35 vite”, duke renditur një sërë projektesh që sipas tij mbajnë gjurmë korrupsioni, nga Tuneli i Llogarasë te Aeroporti i Vlorës. Ai tha se dosjet e saj në SPAK janë me dhjetëra dhe se një prej tyre “ka marrë rrugë tashmë”.
Sipas Bardhit, prokurori i posaçëm Dritan Premçi, që po heton një nga çështjet që përfshin Ballukun, ndodhet nën presion nga brenda SPAK, nga nivelet më të larta të pushtetit, segmente të caktuara mediatike dhe eksponentë të krimit të organizuar.
Duke u shprehur se do të mungojë në seancën e Kuvendit të së hënës, Bardhi publikoi pesë pyetje drejtuar SPAK, për të cilat kërkon përgjigje publike:
- A është e vërtetë që prokurori i posaçëm Dritan Premçi ka thirrur për javën që vjen, me synim komunikimin e statusit “e pandehur” për Zëvendëskryeministren Belinda Balluku?
- A është e vërtetë se për këtë shkak prokurori Premçi ka patur ndërhyrje të drejtpërdrejta nga Kryeministri Edi Rama, për të anulluar thirrjen e Ballukut?
- A ka sajur Balluku një aktivitet ndërkombëtar në të njëjtën ditë që duhet të paraqitej në SPAK, për të shmangur thirrjen dhe për të fituar kohë?
- Pyetje për drejtuesin e SPAK, Altin Dumani: A jeni në dijeni të presioneve ndaj prokurorit Premçi dhe a po e mbështesni atë në ushtrimin e detyrës?
- Cili autoritet brenda SPAK po përpiqet të bëjë “kozmetikë mediatike” në mbrojtje të Ballukut dhe për çfarë arsyeje?
Në fund të reagimit të tij, Bardhi i bën thirrje SHBA-së dhe BE-së të monitorojnë nga afër këtë rast, duke kërkuar mbështetje për prokurorët që “nuk i nënshtrohen presionit politik apo kriminal”.
“Partnerët tanë ndërkombëtarë duhet të garantojnë integritetin e SPAK dhe të mbështesin çdo prokuror që nuk dorëzohet përballë pushtetit apo krimit”, përfundon Bardhi. Gazment Bardhi – Facebook
