Zheni Gjergji
Ish-deputetja demokrate Zheni Gjergji është emëruar drejtoreshë e Spitalit Rajonal “Dr. Xhaferr Kongoli” në Elbasan.
Në një postim Gjergji thekson se pranimi i këtij posti nuk ka qenë një zgjedhje politike, por një vendim profesional, i motivuar nga dëshira për t’i shërbyer qytetarëve të Elbasanit.
“Kjo nuk ishte një zgjedhje e lehtë politike, por një vendim thellësisht profesional dhe njerëzor. Pavarësisht angazhimit tim të mëparshëm politik, unë kam qenë dhe mbetem mjeke. Profesioni im është thirrje, jo pozicion,” – shkruan ajo në postimin e saj.
Gjergji shprehet se rikthimi i saj në sistemin shëndetësor është një mundësi për të kontribuar drejtpërdrejt për komunitetin ku është rritur.
“Elbasani është qyteti im, vendi ku jam rritur dhe ku kam ndërtuar identitetin tim profesional. Të jem në krye të institucionit më të rëndësishëm shëndetësor të këtij qyteti është një nder dhe një sfidë që kërkon përkushtim, dije dhe ndershmëri,” – thekson ajo.
Në përfundim, ish-deputetja thekson se shëndetësia ka nevojë për njerëz që njohin sistemin dhe janë të gatshëm të punojnë me integritet dhe profesionalizëm, përtej bindjeve dhe kornizave politike. a.b
