Janë publikuar detaje të reja në lidhje me hetimet për pronat e ushtrisë, ku prokuroria, me vendim të Gjykatës së Posaçme dhe kërkesë të prokurores Manjola Kajana, ka kryer gjashtë kontrolle të njëpasnjëshme dhe ka sekuestruar prova kyçe si kontrata, dokumente dhe telefona celularë.
Fokusi i hetimeve dhe procedurat
Hetimet kanë nisur pas kallëzimit të ish-zëvendëskomandantit të Forcës Detare, Artur Meçollari, ndaj një vendimi të Këshillit të Ministrave që, më 1 korrik 2020, vendosi dhënien me qira të Bazës Detare Limion në Sarandë, një pronë prej më shumë se 265 mijë metra katrorë, për 20 vite me tarifën simbolike “1 euro” bashkimit të dy shoqërive private. Ky zhvillim solli procedura të shumta hetimore, ku janë marrë në pyetje persona të lidhur me procesin e privatizimit përmes kontratave të dyshimta.
Personat e përfshirë dhe rolet e tyre
Kontrollet dhe hetimet u fokusuan te disa individë kyç:
• Genard Kastrati – Administrator i “Marina Bay Saranda”, subjekt që ka për objekt zbatimin e kontratës së qirasë me Ministrinë e Financave për pasurinë shtetërore të portit Limion në Sarandë.
• Artan Dulaku – Aksioner i kompanisë “Concord Investment”, një nga ortakët kryesorë në kontratën e qirasë. SPAK dhe BKH kanë kryer kontrolle në banesën dhe zyrën e tij dhe hetimet lidhen me dyshimet për manipulim të kontratës.
• Bardhyl Kollçaku – Ish-gjenerali i ushtrisë shqiptare, që mbante pozicion kyç në momentin e firmosjes së kontratës. Ai është paraqitur disa herë në SPAK për sqarime, por ka deklaruar se detajet mbeten sekret hetimor.
Tre individë të tjerë, ende të paidentifikuar publikisht, rezultojnë të jenë pjesë e hetimit për rolin e tyre në procesin e privatizimit dhe transferimit të pronës ushtarake te privatët.
Masa të marra nga prokuroria
Për të mos lejuar tjetërsimin e pronës së ushtrisë, Gjykata e Posaçme ka vendosur sekuestron preventive mbi Bazën Detare Limion në Sarandë, e cila do të qëndrojë nën sekuestro derisa Prokuroria e Posaçme të dalë me një vendim për hetimet që zhvillohen mbi procedurat e ndjekura për dhënien me qira te privati të pronës së ushtrisë.
Agjentët e BKH kanë kontrolluar sot ambiente të dy bizneseve strategjikë që janë përfshirë në rindërtimin me qëllime civile të bazës ushtarake detare të Limionit.
Mes banesave të kontrolluara këtë të mërkurë nga Prokuroria e Posaçme (SPAK) dhe Byroja Kombëtare e Hetimit, është edhe ajo e Bardhyl Kollçakut, ish-deputet i Partisë Socialiste në qarkun e Beratit.
Kollçaku, si ish-Gjeneral Brigade është ndër ushtarakët që kanë firmosur vendimin për nxjerrjen nga plani i përhapjes së ushtrisë të bazës detare të Limionit, në Sarandë.
Sipas raportimeve, emri i tij lidhet me një video filmim 5 orësh, ku disa gjeneralë të ushtrisë diskutonin për shkarkimin e admiralit të Flotës Luftarake Detare dhe për kalimin e bazës së Limionit në administrim të dy kompanive private që kanë përfituar statusin e investitorit strategjik.
