Presidentja e Komisionit Evropian, Ursula von der Leyen, deklaroi sot në Tiranë se Shqipëria ka bërë një përparim të jashtëzakonshëm në procesin e anëtarësimit në Bashkimin Evropian dhe se vendi ndodhet në rrugën e duhur drejt integrimit të plotë.
Në konferencën e përbashkët me kryeministrin Edi Rama, Von der Leyen vlerësoi ritmin e reformave dhe përkushtimin e qeverisë shqiptare në tre vitet e fundit.
“Shqipëria është në rrugën e duhur drejt BE-së. Ju keni bërë progres, por unë dua të theksoj që është një progres i mrekullueshëm – një shpejtësi rekord dhe një përshpejtim shumë të vërtetë në 3 vitet e fundit,” u shpreh ajo.
Presidentja e Komisionit Evropian njoftoi gjithashtu se Brukseli planifikon të hapë këtë vjeshtë grup-kapitullin e fundit në negociatat e anëtarësimit të Shqipërisë.
“Pesë nga gjashtë grup-kapitujt janë të hapur dhe ne planifikojmë të hapim të fundit këtë vjeshtë. E di përpjekjen tuaj personale dhe të ekipit tuaj. Ne do të jemi me ju në çdo hap të kësaj rruge,” shtoi Von der Leyen. a.b
