Kreu i Partisë Demokratike, Sali Berisha, ka akuzuar institucionet e drejtësisë për bllokimin e emërimeve në sistemin gjyqësor, duke e cilësuar Reformën në Drejtësi si një projekt të dështuar dhe të kapur politikisht.
Në një deklaratë për mediat, Berisha u shpreh se Këshilli i Lartë Gjyqësor (KLGJ) dhe Këshilli i Lartë i Prokurorisë (KLP) po pengojnë emërimet për arsye politike dhe klienteliste.
“Ju nuk mund ta imagjinoni se çfarë pengu është sot ai që quhet sistem drejtësie. Ju keni dëgjuar dhe keni lexuar se 80 përqind e prokurorive dhe gjykatave nuk kanë kryetar,” deklaroi Berisha.
Ai shtoi se këto institucione “nuk emërojnë kryetarët e gjykatave për motive ultrakorruptive”, duke akuzuar se vendet po ruhen për “patronazhistët e lidhur me pushtetin”.
“Së fundmi, ato ruhen të gjitha për patronazhistët, të cilët nuk kanë bërë 8 vite në sistemin e drejtësisë. Shikoni se çfarë kapje të tmerrshme i kanë bërë drejtësisë,” theksoi kreu i opozitës.
Berisha e quajti reformën e drejtësisë “produkt të një makinerie propagandistike” dhe akuzoi ish-ambasadorin amerikan Donald Lu dhe ish-ambasadoren e BE-së, Romana Vlahutin, si përgjegjës për gjendjen aktuale të sistemit.
“E bënë reformën, e udhëhoqën dy figurat më të korruptuara të huaja që kanë shkelur në Shqipëri, Donald Lu dhe Vlahutin. Që shkoi e mori në qafë edhe drejtorin e OLAF-it për korrupsionin e saj,” deklaroi ai.
Duke iu referuar sondazheve që tregojnë besim të lartë tek drejtësia e re, Berisha tha se ato janë “produkti më i turpshëm i manipulimit të opinioneve”.
“Historia më e turpshme e manipulimit të opinioneve është ajo e drejtësisë së re që paraqitet e pëlqyera, kur në fakt shqiptarët kanë humbur të drejtën e procesit ligjor,” u shpreh ai.
Në përfundim të deklaratës, Berisha akuzoi mazhorancën dhe mbështetësit ndërkombëtarë të saj se “kanë shpërbërë sistemin e drejtësisë për të justifikuar kapjen politike dhe kontrollin mafioz të tij”. a.b
