Kreu i grupit parlamentar të Partisë Demokratike, Gazment Bardhi, ka bërë publike një shkresë të SPAK, ku konfirmohet regjistrimi i procedimit penal për impiantin fotovoltaik në digën e Zadejës me vlerë 8 milionë euro.
Sipas Bardhit, bëhet fjalë për një aferë korruptive, për të cilën ai kishte depozituar kallëzim penal. SPAK ka regjistruar çështjen me numrin 226/2024, duke e bërë këtë hetimin e katërt që lidhet me ministren Belinda Balluku, krahas dosjeve për tunelin e Llogarasë, kontratat e shitblerjes së energjisë nga KESH dhe çështjen e njohur si “Dy tigra të Vlorës”.
Në reagimin e tij, Bardhi e cilësoi Ballukun si “simbol të korrupsionit të lartë, shpërdorimit të detyrës dhe pasurimit të paligjshëm”, duke akuzuar kryeministrin Edi Rama se i ka besuar asaj drejtimin politik të Tiranës pas shkarkimit dhe arrestimit të Erion Veliajt.
“Mbajtja e Belinda Ballukut në qeveri dhe emërimi i saj në krye të Tiranës janë pjesë e një strategjie për të ndërtuar një mburojë pandëshkueshmërie rreth saj. Tashmë i takon SPAK të tregojë nëse ka forcën të thyejë këtë mburojë apo do të pranojë se kërcënimet dhe mbrojtja politike kanë funksionuar,” deklaroi Bardhi.
Procedimi penal i hap rrugë hetimeve të reja për një prej figurave më të larta të kabinetit qeveritar, ndërsa opozita paralajmëron se do të vijojë të denoncojë aferat korruptive që, sipas saj, kanë përfshirë nivelet më të larta të pushtetit. m.k
