Deputeti i zgjedhur i Partisë Demokratike, Belind Këlliçi, ka reaguar ashpër pas deklarimeve të kryeministrit Edi Rama për ndryshimin e strategjisë së menaxhimit të mbetjeve, nga incenerimi drejt riciklimit. Në një deklaratë për mediat, Këlliçi e cilësoi këtë hap si “pranim publik të dështimit spektakolar” dhe jo si vizion të ri për trajtimin e plehrave në Shqipëri.
Sipas tij, 12 vitet e qeverisjes Rama janë shoqëruar me korrupsion, mashtrim dhe shpërdorim të parasë publike, ku afera e inceneratorëve përbën shembullin më kriminal. Ai theksoi se qindra milionë euro janë zhdukur në tre projekte fantazmë në Elbasan, Fier dhe Tiranë, që as nuk funksionojnë, as nuk kanë trajtuar mbetje sipas standardeve dhe as kanë prodhuar energji. Përkundrazi, ato kanë shkaktuar emergjencë mjedisore duke rrezikuar shëndetin e qytetarëve.
“Pamjet e landfillit të djegur në Elbasan e Vlorë apo malet e plehrave në Sharrë janë dëshmi e kolapsit mjedisor që solli strategjia e inceneratorëve,” tha Këlliçi.
Ai ndali veçmas tek secili rast. Në Elbasan, inceneratori që duhej të trajtonte mbetjet e qarkut, sot nuk funksionon, ndërsa landfilli merr flakë çdo pak muaj, duke konsumuar taksat e qytetarëve që përballen edhe me tarifa më të larta pastrimi. Në Fier, inceneratori i shpallur “model suksesi” nga Rama nuk ka prodhuar gjë tjetër veçse një “pirg betoni pa vlerë”, ndërsa autoritetet lokale refuzojnë ta marrin në administrim. Në Vlorë, 10 milionë euro të hedhura rezultuan vetëm në tym kancerogjen mbi qytetin, duke e lënë edhe këtë vepër jashtë përdorimit.
“Pika kulmore është afera e inceneratorit fantazmë të Tiranës,” u shpreh Këlliçi, duke kujtuar se mbi 170 milionë euro janë paguar për një objekt që nuk ekziston. Sipas tij, Sharra është kthyer në një fushë të madhe mbetjesh që ndot kryeqytetin.
Këlliçi akuzoi SPAK-un se ka trajtuar çështjet si afera të izoluara, duke goditur vetëm zyrtarë të niveleve të ulëta, ndërsa “pronarët e vërtetë të aferës”, Rama dhe Veliaj, mbeten të paprekur.
Duke iu referuar nismës së fundit të qeverisë për ngritjen e një operatori kombëtar të mbetjeve, Këlliçi paralajmëroi se ky projekt është “një tjetër gropë e zezë korrupsioni, një ndërmarrje fasadë për zhdukjen e miliona eurove të tjera”.
Në fund, ai kujtoi se në vitin 2012, qeveria e PD kishte hartuar një strategji të bazuar në riciklim dhe ekonomi të gjelbër, por që u hodh poshtë nga Rama për të favorizuar inceneratorët. “Projekti i inceneratorëve është vjedhja e shekullit, ndërsa ‘riciklimi’ i Ramës është thjesht afera korruptive e radhës,” përfundoi Këlliçi. a.b
