Duke folut për integrimin në BE, kreu i PD, Sali Berisha tha se nëse i jepet përparësi stabilokracisë në krahasim me standardet, kjo i hap rrugën autokracisë! Ky do ishte një gabim i tmerrshëm dhe historik. Berisha foli në konferencën “The Western Balkans Paradigm”, organizuar nga Fondacioni i Partive Popullore Europiane – Martens Centre dhe Fondacioni për Liri dhe Demokraci (FLD) i Partisë Demokratike.
PJESË NGA FJALA E BERISHËS/ Dëshiroj të filloj duke falënderuar zotin Patrick Voller, zoti Tomi Huhtanen dhe të tjerët për praninë e tyre këtu, që është një ndihmë e madhe, është një asistencë e madhe për PD-në dhe opozitën.
Ju jemi shumë mirënjohës dhe i sigurojmë se partia jonë mbetet tërësisht e angazhuar për të mbajtur parimet dhe vlerat që familja jonë, PPE-ja, ka me ne dhe me vendet e tjera.
Pyetja juaj ka rëndësi thelbësore, në kuptimin që integrimi në BE është procesi thelbësor për kombin tim, për kombet tona dhe është ylli polar i programit tonë.
Unë e konsideroj gjeopolitikën pothuajse një forcë natyrore, e cila gjithmonë duhet të merret në konsideratë seriozisht.
Por duke i dhënë përparësi në krahasim me integrimin përmes standardeve, demokracisë, shtetit të së drejtës dhe qeverisjes së mirë, që janë themelet e procesit të integrimit, në mendimin tim është një gabim i tmerrshëm dhe historik.
Nga njëra anë kjo do të thotë tradhti e të drejtave dhe lirive themelore të njeriut, të idealeve dhe aspiratave të një vendi kandidat sepse fakti që ata e shohin të ardhmen më të mirë në BE, mendojnë dhe kanë të drejtë të mendojnë se do jenë më të lirë, më të begatë në ekonominë e tregut dhe qytetarë më të denjë.
Por në rast se ju i jepni përparësi stabilokracisë në krahasim me standardet, apo aderimit për qëllime stabiliteti, kjo do të thotë që i jep rrugën dhe je në aleancë me autokracinë.
Unë mendoj se asnjë vend i lirë i BE do ta donte këtë rezultat.
Kushdo që ka ndonjë dyshim, le të vijë në Shqipëri dhe ta studiojë kazusin.
Shqipëria është një kazus tipik. I ka dhënë prioritet stabilokracisë krahasuar me standardet dhe kjo u transformua në një shtet autokratik.
Por edhe për BE-në në vetvete nuk është vetëm një problem i rëndë moral me vendet kandidate, por gjithashtu do të thotë të vendosësh një virus në themelet e veta pa ditur se cilat do jenë pasojat për të ardhmen.
Një proces i bazuar në meritë është në interesin jetësor të qytetarëve të vendeve kandidatë.
Është mënyra më e mirë për të ndihmuar këto vende që të shkëputin lidhjet me të kaluarën. a.b
