Përveç sulmeve me raketa ndaj zonave të banuara izraelite, mullahët duket se nuk kanë shumë për t’i kundërvënë goditjeve ushtarake të Izraelit. Tre ditë pas fillimit të sulmeve kundër komandës ushtarake dhe programit bërthamor, iranianët duan të kthehen në tryezën e bisedimeve. Në këtë kuadër, ata i bëjnë presidentit amerikan Donald Trump një ofertë të helmuar!
Të premten, Izraeli nisi sulmet ajrore kundër regjimit. Tani, Teherani dëshiron të negociojë sërish me presidentin amerikan Trump për një marrëveshje, raporton “Wall Street Journal”.
Sipas raportimeve, “Irani po dërgon sinjale urgjente se synon një fund të armiqësive dhe rifillimin e bisedimeve për programin e tij bërthamor”. Këtë e kanë konfirmuar zyrtarë qeveritarë nga Lindja e Mesme dhe Europa.
Madje më shumë: Teherani thuhet se ka përfshirë tashmë ndërmjetës arabë, të cilët ia kanë përcjellë dëshirën për negociata Izraelit dhe SHBA-së.
Mesazhi për Jerusalemin është se të dy vendet kanë interes të ndalojnë dhunën. Ndërsa mesazhi për Uashingtonin është se Irani dëshiron të vazhdojë negociatat, për sa kohë që SHBA-të nuk përfshihen në luftimet.
Problemi me ofertën e mullahëve: Sipas ndërmjetësve arabë, Irani nuk është i gatshëm të bëjë lëshime të reja në negociatat për programin bërthamor – si për shembull ndalimin e pasurimit të uraniumit.
Përkundrazi, Teherani thuhet se ka kërcënuar se do të përshpejtojë programin e tij bërthamor dhe do të zgjerojë luftën, nëse bisedimet e reja rezultojnë të pasuksesshme.
Presidenti amerikan Trump e konfirmoi lajmin në mbrëmjen e së hënës, por nuk u shfaq shumë entuziast ndaj ofertës së mullahëve: “Ata duan të bisedojnë. Por këtë duhet ta kishin bërë më herët. (…) Irani nuk po fiton këtë luftë. Duhet të flasin – dhe menjëherë, përpara se të jetë vonë”.
Sipas “Wall Street Journal”, llogaritja e iranianëve është se Izraeli nuk mund të përballojë një luftë të gjatë lodhjeje dhe se pa SHBA-të nuk është në gjendje të shkatërrojë instalimet bërthamore që ndodhen nën tokë. Si për shembull objekti në Fordo, i cili ndodhet nën një mal.
Qeveria e Izraelit nuk pritet të ndikohet nga gatishmëria e supozuar e Iranit për negociata, për ta ndërprerë operacionin. Sipas Forcave Ajrore izraelite, “Izraeli kontrollon qiellin” nga kufiri perëndimor i Iranit deri në Teheran. Me fjalë të tjera: avionët luftarakë izraelitë mund të godasin objektiva ushtarake, të shërbimeve sekrete dhe bërthamore pa u kërcënuar nga forcat ajrore apo mbrojtja ajrore iraniane.
Në fakt, Jerusalemi nuk është kundër negociatave të reja: megjithatë, Irani duhet të pranojë kushtet izraelite dhe amerikane. Objektivat e Izraelit përfshijnë ndër të tjera: heqjen dorë nga pasurimi i uraniumit, ndalimin e financimit të organizatave terroriste (si Hamas, Hezbollahu, Huthi) dhe përfundimin e programit raketor.Bild
