Finalizohet operacioni “Dërgesa 3”, arrestohet 28-vjeçari që pranoi drogë të trafikuar nga SHBA.
Policia e Tiranës ka finalizuar me sukses një tjetër operacion kundër trafikimit të lëndëve narkotike përmes postës ndërkombëtare. Operacioni i koduar “Dërgesa 3”, i organizuar nga Seksioni për Hetimin e Narkotikëve në bashkëpunim me Forcën e Posaçme Operacionale të DVP Tiranë, Drejtorinë Vendore të Policisë Fier, Komisariatin e Policisë Rinas dhe Filialin Qendra Tranzite e Postës Shqiptare, nën drejtimin e Prokurorisë, çoi në prangosjen e një shtetasi.
Në pranga ra shtetasi A. M., 28 vjeç, banues në Fier, i cili u kap në flagrancë në një degë postare në Tiranë teksa merrte një pako me rreth 135 gramë lëndë narkotike të dyshuar cannabis sativa me përqindje të lartë THC. Dyshohet se kjo lëndë narkotike ishte trafikuar nga Shtetet e Bashkuara të Amerikës drejt Shqipërisë.
Gjatë operacionit, shërbimet e Policisë sekuestruan gjithashtu edhe 3 celularë, të cilët do të shërbejnë për vijimin e hetimeve.
Materialet procedurale në ngarkim të të arrestuarit janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme. a.b
