Prokuroria e Posaçme kundër Korrupsionit dhe Krimit të Organizuar (SPAK) ka dhënë sot pretencën për fraksionin e dytë të çështjes së njohur si “5D”, ku të përfshira rezultojnë dy ish-drejtoresha të Bashkisë së Tiranës dhe tre zyrtarë të tjerë.
SPAK kërkon shpalljen fajtore të Deborah Keçit dhe dënimin e saj me 1 vit burg, i cili ulet në 8 muaj si rezultat i gjykimit të shkurtuar. Prokuroria kërkoi gjithashtu pezullimin e dënimit me shërbim prove për një periudhë 2-vjeçare, duke i ndaluar kryerjen e çdo vepre penale gjatë kësaj kohe. Si masë shtesë, Keçit i kërkohet edhe ndalimi për të ushtruar funksione publike për një afat 5-vjeçar.
Në të njëjtën dosje janë përfshirë edhe Teuta Guri, Renaldo Gjerazi dhe Gentjan Meraj. Për ta, prokurori i çështjes Klodian Braho kërkoi nga gjykata dënimin me 9 muaj burg, të cilët reduktohen në 6 muaj në kuadër të gjykimit të shkurtuar. Ashtu si në rastin e Keçit, për tre të pandehurit e tjerë u kërkua pezullimi i dënimit me shërbim prove për 2 vite dhe ndalim i ushtrimit të funksioneve publike për një periudhë 5-vjeçare.
Seanca e radhës gjyqësore, ku pritet të dëgjohen qëndrimet e avokatëve mbrojtës, është caktuar të zhvillohet më 8 maj, në orën 12:00.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
