Një ngjarje e rëndë tronditi qytetin italian të Pordenones mbrëmjen e së dielës, ku një shtetas shqiptar, Vladimir Topjana, 43 vjeç, humbi jetën pasi u qëllua me armë zjarri nga një bashkatdhetar. Ngjarja tragjike ndodhi pranë një lokali ku qytetarët ishin mbledhur për të ndjekur ndeshjen Roma-Juventus.
Sipas raportimeve nga mediat italiane, Topjana ndodhej jashtë lokalit duke biseduar me një të afërm në një zonë parkimi, kur pranë tyre u ndal një mjet tip Audi i bardhë me shpejtësi. Nga automjeti dolën dy persona të tjerë, të cilët po ashtu janë shqiptarë. Mes tyre nisi një debat i ashpër që përshkallëzoi shpejt në përplasje fizike.
Përpjekjet e klientëve të lokalit për të ndalur konfliktin ishin të kota. Të katër personat lëvizën në një hapësirë midis dy bizneseve, ku situata degjeneroi në përdorimin e armës. Njëri prej agresorëve qëlloi të paktën tre herë, duke goditur Topjanën në kokë dhe i shkaktoi vdekjen e menjëhershme.
Skenës së krimit i parapriu një dëshmitar i rastësishëm – kunati i viktimës, i cili tregoi se ndodhej aty rastësisht: “Sapo dola nga makina dhe dëgjova të shtënat. Vrapova dhe e pashë kunatin të shtrirë në gjak. Kërkova ndihmë menjëherë. Nuk më ka ndodhur kurrë një gjë e tillë”.
Sipas autoriteteve, autori i dyshuar i vrasjes është një 30-vjeçar shqiptar, i cili u largua menjëherë nga vendi i ngjarjes, por u arrestua pas disa orësh në tentativë për t’u larguar drejt një qyteti tjetër. Hetimet paraprake tregojnë se viktima dhe autori mund të kenë pasur njohje të mëparshme, pasi agresori iu drejtua drejtpërdrejt Topjanës sapo zbriti nga automjeti. a.b
