EMRAT/ Hakerimi ndaj SPAK, 2 në pranga. U tentua edhe emaili i Dumanit

Tentativë kibernetike ndaj prokurorëve të SPAK, arrestohen dy persona brenda 24 orëve. Të arrestuarit janë Zambak Gjoni dhe Arnold Rrokaj ndërsa akuzohen për veprën penale të ndërhyrjes së paautorizuar kompjuterike, në kuadër të një grupi të strukturuar kriminal.

Prokuroria e Posaçme kundër Korrupsionit dhe Krimit të Organizuar (SPAK) ka bërë të ditur se më 12 mars 2025 është përballur me një përpjekje të paligjshme për të ndërhyrë në adresat e email-eve të disa prej prokurorëve të saj. Falë masave të avancuara të sigurisë, sulmi nuk arriti të depërtojë në sistemin e brendshëm të institucionit, i cili vijon të mbetet i paprekur dhe funksional.

Nga hetimet paraprake rezulton se autorët kanë mundur të hyjnë në disa adresa individuale email-i, por nuk kanë pasur akses në dosje hetimore apo sistemin qendror të IT-së. Në shënjestër ishte edhe email-i i Drejtuesit të Prokurorisë së Posaçme, z. Altin Dumani, por tentativa dështoi.

Falë një hetimi intensiv të drejtuar nga SPAK, me përfshirjen e Byrosë Kombëtare të Hetimit (BKH) dhe Sektorit të Ekspertizës, brenda vetëm 24 orëve u bë e mundur identifikimi dhe arrestimi i dy shtetasve – njëri përgjegjës për ndërhyrjen kibernetike dhe tjetri për shpërndarjen e informacionit të marrë te persona të tretë.

Gjatë operacionit janë sekuestruar pajisjet e përdorura për ndërhyrjen, si dhe skedarët e shkarkuar. Prokurori i çështjes ka urdhëruar që çdo person në posedim të këtyre informacioneve të mos i publikojë, për të ruajtur sekretin hetimor.

Hetimet kanë përfshirë edhe individë të tjerë të dyshuar për lidhje me ngjarjen, ndërsa paralelisht është zhvilluar edhe një hetim i brendshëm administrativ që konfirmoi integritetin e sistemit IT të institucionit.

Deri më tani, nuk ka prova që personat e arrestuar të kenë bashkëpunuar me ndonjë punonjës të brendshëm të SPAK. Strukturat e sigurisë kanë ndërmarrë masa shtesë për të forcuar më tej mbrojtjen e sistemit IT dhe të dhënave sensitive.

SPAK thekson se mbrojtja e dosjeve hetimore dhe e integritetit të institucionit mbetet prioritet absolut. Hetimet po vijojnë në pistën e ekzistencës së një grupi të strukturuar kriminal. a.b

/DRONI.al/