Në një ceremoni solemne dhe historike për Kishën Ortodokse Autoqefale Shqiptare, Joan Pelushi është fronëzuar sot si Kryepeshkop i ri, duke marrë zyrtarisht drejtimin e kësaj kishe pas ndarjes nga jeta të Kryepeshkopit Anastas Janullatos. Thirrja tradicionale “I denjë!” e besimtarëve kumboi fuqishëm nga kisha “Ngjallja e Krishtit” në Tiranë, duke e pranuar Pelushin si udhëheqësin e ri shpirtëror të komunitetit ortodoks shqiptar.
Fronëzimi u zhvillua përmes një liturgjie të veçantë, në prani të mijëra besimtarëve, përfaqësuesve të 13 kishave ortodokse të botës dhe figurave të larta të shtetit shqiptar. Të pranishëm ishin Presidenti i Republikës Bajram Begaj, ish-presidentë, drejtues të Kuvendit, anëtarë të qeverisë dhe opozitës, si dhe përfaqësues diplomatikë. Një ndër të ftuarit ishte ministri i mbrojtjes i Greqisë, Nikos Dendias, i cili ndoqi të gjithë shërbesën në këmbë, sipas rregullit të ritit ortodoks.
Në emër të Sinodit të Shenjtë, kleri ortodoks i dorëzoi Kryepeshkopit të ri simbolin e udhëheqjes shpirtërore dhe i shprehu urimet për misionin që e pret.
Angazhim dhe mirënjohje për paraardhësin
Në fjalimin e tij të parë si primat i Kishës Ortodokse Autoqefale Shqiptare, Fortlumturia e Tij Joan Pelushi theksoi përkushtimin ndaj detyrës së re dhe përmendi me mirënjohje kontributin e paraardhësit të tij, Anastas Janullatos, të cilin e cilësoi si figurë kyçe për ringritjen dhe konsolidimin e kishës ortodokse shqiptare në dekadat e pas komunizmit.
Joan Pelushi, i cili ka shërbyer për dekada si peshkop dhe anëtar i Sinodit të Shenjtë, është përzgjedhur unanimisht në këtë detyrë të shenjtë. Me fronëzimin e tij, ai do të mbajë këtë mision shpirtëror për gjithë jetën, duke udhëhequr komunitetin ortodoks shqiptar në përballimin e sfidave të kohës dhe ruajtjen e identitetit të besimit.
Ceremonia përmbylli një kapitull të rëndësishëm në historinë e kishës, ndërsa hapi rrugën për një epokë të re nën udhëheqjen e Kryepeshkopit Joan Pelushi. a.b
