Ilirjan Celibashi
Komisioni Qendror i Zgjedhjeve ka miratuar fletën e votimit për zgjedhjet parlamentare të 11 majit, duke vendosur që dokumenti të jetë gati një muaj përpara nisjes zyrtare të fushatës.
Fleta e votimit për Tiranën
Gjatë mbledhjes, komisioneri Ilirjan Celibashi konfirmoi se është marrë në konsideratë propozimi i përfaqësuesit të Partisë Demokratike, Marash Logu, për të bërë disa korrektime në mënyrën e shkrimit të emrave të kandidatëve me dy mbiemra. “Vendimmarrja e sotme lidhet me përmbajtjen e fletës së votimit, se si do të shfaqen kandidatët në të. Pas rishikimit të kërkesave, miratojmë fletën e votimit për 12 qarqet, duke bërë ndryshimet e nevojshme për kandidatët me dy mbiemra,” tha Celibashi.
Sipas tij, fakti që fleta e votimit është gati para fushatës do t’u vijë në ndihmë partive politike për të planifikuar më mirë strategjinë e tyre elektorale. “Si asnjëherë më parë, kemi përmbajtjen e fletës së votimit të finalizuar një muaj përpara nisjes së fushatës, ndërsa në të kaluarën ka ndodhur që të miratohej edhe gjatë fushatës,” shtoi ai.
Gjithashtu, Celibashi bëri të ditur se në javën e parë ose të dytë të prillit, fleta e votimit do të jetë gati edhe për votuesit e diasporës. “Jemi në fazën e përzgjedhjes së kompanisë që do të kryejë printimin dhe shpërndarjen. Nëse procesi ecën me ritme të shpejta, votuesit nga jashtë do ta kenë fletën e votimit jo më vonë se një javë për të bërë përzgjedhjen e tyre,” sqaroi ai.
