Mbikqyrësi i Fronit Kryepiskopal, Joan Pelushi është zgjedhur kryepeshkop i ri i Kishës Ortodokse Autoqefale të Shqipërisë. Ai u zgjodh sot nga Sinodi i Shenjtë pas gati 50 ditësh nga ndarja nga jeta e kryepeshkopit Anastas Janullatus. Ndërkohë ceremonia e fronëzimit të tij do të mbahet më 29 mars.
“Sot, më 16 mars 2025, të dielën e dytë të Kreshmës, kushtuar Shën Grigor Palamait, pas Liturgjisë Hyjnore dhe në përputhje me Traditën e Shenjtë dhe Statutin e Kishës Orthodhokse Autoqefale të Shqipërisë, u mbajt në Qendrën Sinodike në Tiranë mbledhja e Sinodit të Shenjtë të Kishës Orthodhokse Autoqefale të Shqipërisë me qëllim zgjedhjen e Kryepiskopit të ri.
Pas lutjes, anëtarët e Sinodit të Shenjtë, nën kryesinë e Mbikëqyrësit të Fronit Kryepiskopal, Hirësisë së tij Mitropolitit të Korçës Imzot Joanit, me vota kanonike në mënyrë unanime zgjodhën njëzëri pasuesin e të ndjerit Kryepiskopit Anastas”, thuhet në njoftimin e Kishës Ortodokse.
Kjo është hera e parë që Sinodi zgjedh kryepeshkopin, pasi Kisha Ortodokse u udhëhoq për më shumë se tri dekada nga Anastasi.
Sinodi i Shenjtë i Kishës u mblodh pas Liturgjisë Hyjnore, që përkon edhe me Ditën e Dytë të Kreshmës. Pas vendimit të sinodit, Kryepeshkopi i ri do të hyjë në Katedrale ku do të japë edhe një mesazh publik. a.b
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
