Policia e Shtetit ka finalizuar me sukses një operacion të ndërlikuar për arrestimin e dy shtetasve shqiptarë të shpallur në kërkim ndërkombëtar, të renditur mes 100 personave më të kërkuar në Itali. Operacioni, i koduar “Difficult conditions”, u zhvillua në kushte të vështira terreni dhe moti, duke rezultuar në kapjen e dy individëve që fshiheshin prej vitesh në fshatin Rreth-Kale të Dibrës.
“Të arrestuarit, Andon (alias Afrim) Sina, 51 vjeç, dhe Niko (alias Faslli) Sina, 48 vjeç, ishin shpallur në kërkim nga drejtësia italiane që prej vitit 1999. Ata ishin dënuar me 14 vjet e 11 muaj burg secili nga Gjykata e Apelit të Napolit në vitin 2006, për vrasje me dashje të kryer në bashkëpunim dhe tentativë vrasjeje. Sipas autoriteteve, më 22 shtator 1999, në komunën Griciniano d’Aversa të Italisë, dy të arrestuarit vranë me sende të forta dhe mjete prerëse shtetasin shqiptar B.C. dhe plagosën rëndë shtetasin F.S., për motive të lidhura me ndarjen e të ardhurave nga aktivitete të paligjshme”, njoftoi Policia e Shtetit.
Operacioni u zhvillua nga Drejtoria e Forcës së Posaçme Operacionale në bashkëpunim me Divizionin e 2-të dhe Zyrën e Ekspertit të Sigurisë në Shqipëri. Hetimet intensive, të bazuara në inteligjencën policore dhe shkëmbimin e informacionit me autoritetet italiane, mundësuan identifikimin dhe lokalizimin e të kërkuarve, të cilët jetonin nën identitete të rreme në një zonë të izoluar malore. r.k
