Një ngjarje e rëndë ka ndodhur mbrëmjen e sotme në Vlorë, ku një 34-vjeçar, në gjendje të dehur, ka shkaktuar disa aksidente rrugore dhe ka tentuar t’i largohet Policisë.
Sipas informacioneve zyrtare, rreth orës 19:50, në rrethrrotullimin e Çoles, lagjja “1 Maji”, shtetasi K. Ll., 34 vjeç, banues në Vlorë, duke drejtuar një automjet tip “Benz”, ka përplasur fillimisht tre mjete dhe më pas, gjatë përpjekjes për t’u larguar, ka goditur edhe një tjetër mjet të drejtuar nga shtetasja A. K., rreth 50 vjeçe. Kjo e fundit ndodhet në spital, jashtë rrezikut për jetën.
Policia ka ndërhyrë menjëherë pas marrjes së njoftimit, duke u vënë në ndjekje të 34-vjeçarit, i cili ka tentuar të largohet me manovra të rrezikshme. Në përpjekje për t’i shpëtuar arrestimit, ai ka goditur edhe dy mjete të Policisë, duke rrezikuar jetën e efektivëve.
Pas një ndjekjeje të vazhdueshme, në një zonë të pabanuar, shërbimet e rendit kanë arritur ta ndalojnë dhe ta shoqërojnë drejt komisariatit për veprime të mëtejshme ligjore.
Ndërkohë, grupi hetimor vijon punën për sqarimin e plotë të rrethanave dhe dokumentimin e kësaj ngjarjeje.
