Nga Sonila Meço
Unë nuk përdor tik-tok.
Një adresë ma ka hapur para tre vitesh një nga djemtë e web-it në punë me idenë për të postuar video të shkurtra nga programi Task Force, por nuk kisha kohë fizike të merresha.
Staf nuk kemi, mundësi punësimi të një njeriu të dedikuar programi jo e jo. Ndaj ia besova web-it të Syri-t në faqet zyrtare lajmet dhe videot nga Task Force.
Për postime ngjarjesh e arsyesh personale, përpos kohës së pamjaftueshme, nuk kisha asnjë interes.
Përdor Facebook dhe Instagram.
Ime bijë adoleshente përdor snapchat dhe tik-tok. Për aq sa e kemi nën kontroll, nëpërmjet celularit të saj, nuk ka adresë në tik-tok dhe ndjek llogari jo të rrezikshme për moshën e saj. E kemi këshilluar, urdhëruar, dënuar, ndaluar në kohë të ndryshme, i kemi treguar pasojat e rënda të përdorimit të rrjeteve sociale. Me durim ia kemi dalë me sa kemi mundur të krijojmë një gardh rrethues kundrejt “sulmit” agresiv të varësisë e përmbajtjeve të rrezikshme të tik-tok-ut. Dhe rebelimit të adoleshentes sonë.
Pra në kushte normale, të një vendi ku qeverisja ka prioritet shëndetin mendor dhe fizik të fëmijëve e popullit të saj, me media të lira e shumllojshmëri linjash editoriale, lajmi i mbylljes së tik-tok-ut nuk do më prekte në derën e shtëpisë e profesionit tim.
Por motivet bëhen shqetësuese për pasojat mu bash për shkak të kushteve të mbylljes së tik-tok-ut me urdhër padroni pa asnjë debat publik, konsultim juridik, analizë:
– Përgjatë fushatës elektorale për zgjedhjet e përgjithshme.
– Vetëm për një vit, që përkon bash me vitin zgjedhor.
– Me argumentin e rrezikut për fëmijët. Pra kur në shkolla hyn thika e armët, ku autoriteti i mësuesit është përçudnuar nga qeveria e punësimeve patronazhiste.
Po tek ky argument, vendimin e merr qeveria e nivelit arsimor më të ulët në Europë, me renditjen e fundit në testet PISA.
Po tek shëndeti mendor e fizik i fëmijëve, vendimi i mbylljes 12 mujore merret nga qeveria, që me shëndetësinë “falas” dhe mungesën e barnave e cilësinë e tyre ka shkaktuar viktima.
Po kjo filozofi qeverisëse, që ka kontrolluar aq fort çdo institucion shtetëror e shoqëror, duke prodhuar depresion e ankth gjeneralizues tek çdo familje.
-Në epokën e kapjes së plotë të mediave tradicionale, kontrollit të atyre sociale nëpërmjet ushtrive të organizuara të manovrave manipuluese të algoritmeve, censurimit dhe devijimit të mendimit të lirë, kundra pushtetit autoritar.
– Në kohën e përsosjes së makinerisë së propagandës rilindase, që buçet nga çdo altoparlant patronazhistësh e mercenarësh pushteti.
– Në periudhën më të rëndë të denigrimit të një pushteti thuajse absolut 12 vjeçar, kur rotacioni deri dje i pamundësuar edhe nëpërmjet lobimeve për shkatërrimin e kundërshtarëve po fiton terren në perceptimin publik me shprehjen e ideve, angazhimin publik e politik edhe në platformën tik-tok.
– Kur bizneset po rezistojnë me çdo mënyrë të mbijetojnë nga zhbërja e konkurencës së lirë e ku “suksesi” i tyre varet nga afërsia me pushtetin, u ngushtohet edhe më hapësira e lirë promovuese.
Motivet e vërteta të këtij vendimi deduktohen lehtësisht prej kohës, mënyrës së përzgjedhur dhe arsyeve në mendjen e një autokrati, që do të mbretërojë në vendin nga iku iket masivisht. Lojtar i skakierës me kundërshtarë të drobitur e sakatuar, nuk luan dot ndryshe, përpos se i vetëm, i pabezdisur, i pakonkuruar, i pasfidueshëm dhe me mjete për të paralizuar çdo kundërshtar në lojë a mes tifozëve.
Ky po, që është rrezik kombëtar…edhe ndërkombëtar po deshët me pasoja shumfish më të rënda se mbajtja hapur e tik-tok-ut për zhvillimin, të drejtat, liritë dhe shëndetin mendor e fizik të njerëzve. Atyre, që i do domosdoshmërisht të kontrolluar, përpos se të izoluar, nënshtruar e depersonalizuar.
Edhe rruga drejt ferrit është e shtruar me qëllime të mira…në rastin tonë as qëllimet nuk janë të tilla.
Të mbyllet tik-tok-u, apo autokracia?
