Presidenti i Ukrainës, Volodymyr Zelensky, deklaroi se vendi i tij është i gatshëm të ulet në tryezën e negociatave për një paqe të qëndrueshme dhe propozoi një armëpushim të menjëhershëm në ajër dhe në det. Përmes një postimi në rrjetin social X, ai theksoi angazhimin për të punuar me administratën amerikane në këtë drejtim.
“Askush nuk e dëshiron paqen më shumë se ukrainasit. Ekipi im dhe unë jemi të gatshëm të punojmë nën udhëheqjen e fortë të Presidentit (SHBA) Trump për të arritur paqen e qëndrueshme,” shkroi Zelensky, duke nënvizuar synimin e Kievit për të përshpejtuar përfundimin e luftës.
Si masa të para për uljen e tensioneve, ai propozoi lirimin e të burgosurve, ndalimin e sulmeve me raketa me rreze të gjatë dhe dronëve mbi infrastrukturën civile, si dhe një ndërprerje të armiqësive në det – me kusht që Rusia të ndërmarrë hapa të ngjashëm.
Kreu i shtetit ukrainas falënderoi gjithashtu Shtetet e Bashkuara për mbështetjen e tyre ushtarake, duke kujtuar transferimin e raketave Javelin gjatë presidencës së mëparshme Trump.
Duke iu referuar takimit të tij në Uashington, Zelensky e quajti “turp” që nuk shkoi siç ishte planifikuar dhe bëri thirrje për një qasje më konstruktive në bashkëpunimin mes dy vendeve. Ai përsëriti gatishmërinë e Ukrainës për të nënshkruar një marrëveshje mbi mineralet dhe sigurinë me SHBA-të, duke e cilësuar atë si një hap drejt garancive më të forta të sigurisë.
Nga ana tjetër, zëvendëspresidenti amerikan J.D. Vance i bëri thirrje Kievit të angazhohet më aktivisht në “diskutime private” për përfundimin e luftës me Rusinë. Duke komentuar tensionet e fundit mes Zelensky-t dhe Trump në Zyrën Ovale, Vance tha se Ukraina duhet të përcaktojë qartë nevojat dhe kërkesat e saj në negociatat me Uashingtonin.
