ILDA ZHULALI/ Kur thamë se Rama korruptonte

Nga Ilda Zhulali

Kur thamë që po kanabizonin Shqipërinë, na quajtën halucinantë – më vonë u arrestua Saimir Tahiri;

Kur thamë që po transportonin drogën me avionë, u ngërdheshën dhe thanë që po spërkasnin mushkonjat – pastaj ra avioni i Riformatos;

Kur thamë që po blinin zgjedhjet në bashkëpunim me krimin, na quajtën të paaftë dhe bërtisnin “1 milionë shuplaka” – pastaj dolën dosjet 339 dhe 184, doli Elbasani, Kavaja, Shkodra, Çyrbja, EncroChat, Sky ECC;

Kur thamë që po shpopullonin vendin, na quajtën anakronikë – pastaj bizneset mbetën pa punëtorë, shkollat pa nxënës, prindërit pa fëmijë, INSTAT-i u detyrua të publikonte të dhënat e regjistrimit të popullsisë me 1 vit vonesë;

Kur folëm për vjedhjet katastrofike në shëndetësi, na quajtën makaber – pastaj plasën skandalet me COVID-in, onkologjikun, heqjen e rimbursimit të ilaçeve për pensionistët;

Kur thamë që po pastronin paratë e krimit, na quajtën zdromsa – pastaj mbiu betoni pjellor, u futën në listën e zezë të pastrimit të parave, erdhi DEA, belgët, gjermanët, spanjollët, italianët dhe lëshuan dosjet me gjëma;

Kur denoncuam korrupsionin e incineratorit dhe të 5D, na quajtën budallenj – pastaj u detyruan të çonin në burg ca drejtorë që të amnistonin Erionin;

Kur thamë që kishin kapur drejtësinë, na shpallën armiq – pastaj lanë vendin pa Gjykatë Kushtetuese dhe Gjykatë të Lartë për tre vite, lanë 140.000 familje pa vendim gjyqësor dhe u thanë prisni 15 vjet, ngritën procese farse kundër opozitës dhe amnistuan vjedhjet qindra milionë euro përmes koncesioneve;

Kur thamë që Rama korruptonte të huajt, na quajtën të çmendur – pastaj u arrestua McGonigal në Amerikë, Shqipërinë e nxorën në shitje dhe në foto nxirrnin Aleksin;

Kur thamë që donin të shkatërronin opozitën, na quajtën anti-euroatlantikë, na thanë do hani bar – pastaj plasën skandalet që zbuloi Trump, dolën emrat, pagesat, lidhjet;

Kur thamë që do të ngriheshim nga hiri, na përqeshën për tre vite rresht, s’ka opozitë – thanë – por edhe pa sigël, pa komisionerë, pa fonde, dhe nën presion e terror nuk i tundën dot 40% të shqiptarëve, tre rezoluta të 184 partive konservatore, përfshi amerikanët e britanikët deklaruan se do të mbështesin PD për zgjedhjet e ardhshme dhe për t’i dhënë fund narkoshtetit të Ramës, PD dhe Kryetari i saj Berisha e çanë rrethimin.

Tani ju themi që ne do ta përmbysim këtë gjendje katastrofike që keni shkaktuar. Na quani çfarë të doni. E dini dhe vetë që e keni të afërt fundin në gropën që hapët për shqiptarët!
Koha e ndryshimit ka ardhur, dhe askush nuk do të na ndalojë!
Është radha jonë!

Shihemi në orën 5.

/DRONI.al/