Kryetari i Grupit Parlamentar të Partisë Demokratike, Gazment Bardhi, ka reaguar ashpër ndaj veprimeve të fundit të Presidentit Bajram Begaj, duke e akuzuar atë për veprime në favor të kryeministrit Edi Rama me qëllim kapjen e plotë të Gjykatës Kushtetuese.
Në një deklaratë për mediat, Bardhi e cilësoi aktin e Presidentit si “të pashëmbullt” dhe “të papranueshëm”, duke theksuar se Kushtetuta garanton një mandat të plotë 9-vjeçar për gjyqtarët e Gjykatës Kushtetuese, i cili nuk mund të cenohet në asnjë rrethanë pas fillimit të detyrës.
“Cënimi i mandateve nënkupton cenimin e vetë pavarësisë së Gjykatës dhe parimeve themelore të shtetit të së drejtës,” deklaroi Bardhi.
Ai shtoi se veprimi i Presidentit Begaj tregon një “guxim të tepruar” për të shkelur Kushtetutën, vetëm që Edi Rama të marrë nën kontroll të plotë Gjykatën Kushtetuese.
“Duke dënuar me forcë aktin e sotëm të Bajram Begajt, apeloj që kjo lojë që rrezikon legjitimitetin e vetë Gjykatës Kushtetuese, të ndalet menjëherë,” përfundoi Bardhi.
Ky reagim vjen pas kërkesës së Presidentit Begaj drejtuar Gjykatës Kushtetuese për të sqaruar dhe rregulluar mekanizmin e përtëritjes së mandateve të anëtarëve të saj. a.b&ai
