Ilir Meta në seancën e masës së sigurisë para pak javëve.
Presidenti i Partisë së Lirisë Ilir Meta është pyetur sot për herë të parë pas arrestimit të tij të dhunshëm nga forcat speciale.
Ai u pyet prej orës 11 paradite deri në orën 1.20. Avokati i tij Genc Gjokutaj tha se Meta u pyet për lobimin e PL në SHBA. Ai tha se Metavishte bashkëpunues dhe ka dhënë të gjitha sqarimet e duhura.
Prokurorët nuk e lejuan të komunikonte me mediat pas seancës së pyetjeve.
Më herët Meta kishte shkruar në rrjete sociale.
”Rreth 15 minuta më parë mediat e regjimit mashtruan duke pretenduar se unë kam hyrë në ambientet e SPAK. Nuk është e vërtetë.
Unë akoma jam në qelinë Nr.5, i gatshëm që në ora 10:00 për të shkuar në SPAK edhe pse lajmërimin e kam marrë nga mediat e regjimit dhe jo sipas procedurave ligjore.
Mezi po pres të takohem me “kolegët” e megahajdutëve të regjimit më të korruptuar në kontinent dhe pas seancës reciproke të pyetjeve në SPAK, jam i hapur t’u përgjigjem pyetjeve të gazetarëve”, shkruante Meta në mëngjes.
Ish-kreu i shtetit qëndron në paraburgim prej 21 tetorit 2024, teksa hetohet për “korrupsion”, “pastrim parash” dhe “fshehje e mosdeklarim të pasurisë”.
Kjo është hera e tretë që Meta paraqitet para prokurorëve, në cilësinë e dhënies së deklarimeve, këtë herë si person nën hetim, pasi në 2 vizitat e mëparshme ka qenë në SPAK se person që ka pasur dijeni. a.b
