Kordinatorja e PD për diasporën, Jozefina Topalli bëri ftesë sot shqiptarëve që jetojnë jashtë të regjistrohen për të votuar.
“Shqipëria ka kaluar sfida të mëdha. Ju që jeni larg, i shihni shpesh këto sfida me dhimbje dhe me shqetësim. Por si mundemi ta shohim Shqipërinë e nesërme? E shohim si një vend që thërret bijtë e saj të kontribuojnë jo vetëm financiarisht, por edhe me ide, me eksperiencën që keni fituar jashtë? A mundemi të punojmë së bashku për një Shqipëri më të drejtë, më të ndershme dhe më të përparuar?
Shumë njerëz e mendojnë diasporën si një zë që vjen nga larg. Por unë besoj se ju keni forcën për të qenë më shumë se kaq. Ju jeni ata që mund të filloni projekte konkrete – në arsim, në ekonomi, në kulturë. Çdo ide e sjellë këtu nga Firence, nga zemra e artit dhe qytetërimit, mund të bëhet frymëzim për ne që jemi në Shqipëri. Ndryshimi fillon aty ku ne zgjedhim të ndërtojmë ura dhe jo mure.
Sot, nuk dua thjesht të flas për atë që është bërë apo që nuk është bërë në Shqipëri. Dua t’ju ftoj të mendoni për atë që mund të bëjmë së bashku. Shqipëria nuk është thjesht një vend. Shqipëria është kujtesa jonë, shpirti ynë, rrënjët tona. Dhe kudo që shkojmë, atë e mbajmë me vete. Bashkimi ynë, vullneti ynë, përpjekjet tona të përbashkëta, janë garancia për një të ardhme më të mirë”, tha Topalli gjatë një takimi të mbajtur në Firence. a.b
