Tenderi për Porto Romanon/ Berisha: Qeveria e PD nuk do të njohë asnjë tender nga sot deri në 15 maj

Kreu i PD, Sali Berisha ka deklaruar sot se qeveria e ardhshme e Partisë Demokratike nuk do të njohë asnjë tender të shpallur nga mazhoranca aktuale deri më 15 maj 2024, duke akuzuar qeverinë Rama për abuzime me fondet publike dhe përpjekje për të favorizuar klientët e saj politikë dhe ekonomikë.

Në një deklaratë për shtyp, Berisha e cilësoi shpalljen e tenderit prej 400 milionë euro për fazën e parë të portit të ri në Porto Romano si “vjedhjen më të madhe në historinë ekonomike të vendit”. Ai u bëri thirrje kompanive ndërkombëtare të mos marrin pjesë në këtë proces, të cilin e quajti të korruptuar dhe të paligjshëm.

“Qeveria po shfrytëzon ditët e fundit të vitit për të mbuluar një krim ekonomik të paprecedent. Pasi anuloi për arsye pazaresh tenderin e parë, ajo po shpall këto ditë tenderin për fazën e parë të portit të Porto Romanos. Fituesi është përcaktuar, por dua t’i paralajmëroj të gjitha kompanitë ndërkombëtare që qeveria e PD nuk do ta njohë këtë tender dhe asnjë tjetër të firmosur nga sot deri më 15 maj,” deklaroi Berisha.

Ai theksoi se ligji shqiptar ndalon prokurimet publike katër muaj para zgjedhjeve dhe akuzoi qeverinë Rama për shkelje flagrante të këtij ligji.

“Ky projekt dënon çdo shqiptar me një barrë prej 1.3 miliardë eurosh. Paratë e taksapaguesve shqiptarë nuk do të përdoren për pasurimin e Edi Ramës dhe klientëve të tij, por për rritjen e rrogave dhe pensioneve të qytetarëve,” shtoi ai.

Berisha gjithashtu premtoi që porti i Durrësit do të ruajë funksionalitetin e tij dhe do të përmirësohet me projekte ekzistuese, duke kundërshtuar çdo plan për transferimin e operacioneve në Porto Romano.

“Kurrë shqiptarët nuk do të ndërtojnë me taksat e tyre një port të ri që shërben vetëm për parajsën e Ramës, Alabarit dhe çunave të Dubait. Porti i Durrësit do të thellohet dhe modernizohet për të përmbushur nevojat e vendit,” përfundoi Berisha. r.p

/DRONI.al/