Partia Demokratike intensifikon bashkëpunimin me Republikanët amerikanë dhe konservatorët britanikë për zgjedhjet e 11 majit 2025
Partia Demokratike ka nisur një fazë të re të bashkëpunimit ndërkombëtar në kuadër të fushatës për zgjedhjet parlamentare të 11 majit 2025. Në një takim të zhvilluar sot, kryetari i PD-së, Sali Berisha, mirëpriti përfaqësuesit e Leadership Institute, Ron Nehring dhe Peter Smallwood, duke formalizuar mbështetjen e republikanëve amerikanë dhe konservatorëve britanikë për ndërtimin e një strategjie elektorale moderne.
Gjatë takimit, Berisha analizoi situatën aktuale politike në Shqipëri, duke evidentuar problematika si ndërhyrjet e paligjshme të shtetit në zgjedhje, keqpërdorimin e të dhënave personale dhe presionin ndaj votuesve. Ai theksoi rëndësinë e bashkëpunimit me aleatët ndërkombëtarë për të garantuar një fushatë të ndershme dhe të fuqishme, që rikthen besimin te qytetarët shqiptarë.
“Mbështetja e miqve tanë republikanë dhe konservatorëve britanikë është thelbësore për të ndërtuar një fushatë të bazuar në vlera demokratike,” deklaroi Berisha. Ai nënvizoi se të rinjtë dhe gratë do të jenë në qendër të kësaj nisme, duke ofruar një alternativë të re përballë një qeverie që, sipas tij, ka dështuar në tre mandate.
Ky angazhim ndërkombëtar vjen si vazhdimësi e mbështetjes nga rezolutat e miratuara nga IDU dhe EPP, të cilat kanë shprehur besimin e tyre te Partia Demokratike si një forcë qeverisëse dhe partner i besueshëm.
Me këtë bashkëpunim, Partia Demokratike synon të ndërtojë një strategji elektorale të fokusuar te qytetarët, duke promovuar mirëqenien dhe transparencën si vlera kryesore për një të ardhme më të mirë për Shqipërinë. a.b
