Apeli i Posaçëm prish vendimin e GJKKO për inceneratorin e Fierit, gjykim tjetër me të tjerë gjyqtarë

Gjykata e Posaçme e Apelit prish vendimin për inceneratorin e Fierit, çështja kthehet për rigjykim

Gjykata e Posaçme e Apelit ka vendosur të prishë vendimin e shkallës së parë lidhur me çështjen e inceneratorit të Fierit, duke e kthyer atë për rigjykim në të njëjtën shkallë, por me një trupë gjykuese të re. 

Ky vendim vjen pas ankimimeve të bëra nga Prokuroria e Posaçme kundër Korrupsionit dhe Krimit të Organizuar, si dhe nga të pandehurit, përfshirë ish-ministrin e Mjedisit, Lefter Koka, ish-deputetin Alqi Bllako, dhe biznesmenin Klodian Zoto.

“Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët EngertPëllumbi (kryesues), Dhimitër Lara (anëtar) dhe Miliana Muça (anëtare),  më datë 19.12.2024, shpalli vendimin lidhur me çështjen e regjistruar me nr. 26 akti, datë 04.04.2024regjistrimi, mbi ankimin e Prokurorisë së Posaçme kundër Korrupsionit dhe Krimit të Organizuar, si dhe mbi ankimet eankuesve/të pandehurve L.K., A.B., P.A., S.C., F.M., A.Sh., A.K., E.M., K.Z., L.D., A.D., J.Y., kundër vendimit nr. 57, datë 25.09.2023 të Gjykatës së Posaçme të Shkallës së Parëpër Korrupsionin dhe Krimin e Organizuar, dhe vendosi:

Prishjen e vendimit nr.57, datë 25.09.2023 të Gjykatës së Posaçme të Shkallës së Parë për Korrupsionin dhe Krimin e Organizuar, dhe kthimin e akteve kësaj gjykate me tjetër trup gjykues.

Kundër këtij vendimi mund të bëhet rekurs në Gjykatën e Lartë brenda 20 (njëzet) ditëve nga e nesërmja e njoftimit të tij”, thuhet në vendimin e Apelit të Posaçëm.

Në shtator të vitit të kaluar, Gjykata e Posaçme e Shkallës së Parë kishte dënuar Lefter Kokën me 6 vjet e 8 muaj burg për “korrupsion”, “shpërdorim të detyrës” dhe “pastrim të parave”. Alqi Bllako ishte dënuar me 2 vjet e 8 muaj burg, ndërsa Klodian Zoto me 12 vjet burg. 

Të pandehur të tjerë në këtë çështje përfshijnë Pëllumb Abeshin, Sabina Canamerin, Azem Shaterin, Florian Muçën, Arben Dervishin, Arjola Kodrën dhe Juri Ymerajn. r.k

/DRONI.al/