Ministri i Brendshëm, Ervin Hoxha tha sot se do të financohet kompensimi ushqimor për policët përmes një fondi prej 10 milionë euro.
Po ashtu ministri theksoi edhe orët shtesë të punës për të cilat janë parashikuar 5.8 mln euro. Në këtë buxhet janë përfshirë edhe dietat e udhëtimet.
“Në lidhje me kompesimin ushqimor e gjitha është parashikuar në buxhet dhe e gjitha është 10 mn euro që janë parashikuar për kompensimin ushqimor. Sa i përket orëve të punës edhe këtu janë parashikuar 5.8 mln euro për të përballuar shpenzimet sa i përket orëve të punës, dieta dhe udhëtime këto janë të gjitha pjesë e shpenzimeve dhe mallrave që mbulohen po nga ky buxhet. Sa i përket planifikimit dhe investimeve të huaja mbetet në fokusin tonë prioritar, objekti dhe misioni i rëndësishëm, smart city me 13 mln euro”, u shpreh ministri i Brendshëm.
Përmes këtij buxheti do të financohen disa projekte në vijim nga viti i kaluar, siç janë rikonstruksioni i Drejtorive të Policisë Elbasan dhe Berat; ndërtimi dhe rikonstruksioni i Komisariateve Sarandë, Krujë dhe Kurbin, si dhe i Stacioneve Policore Patos e Roskovec, në DVP Fier.
“Financimet e tjera prekin projekte në fushën e Teknologjisë dhe Informacionit, përmirësimin e sistemit të trajtimit të aplikimeve për qytetarët dhe subjektet tatimpaguese, ngritja e sistemit të menaxhimit të informacionit për Akademinë e Sigurisë Publike – eAkademia, etj.
Policia e Shtetit në buxhetin 2025 parashikohet të ketë një rritje në masën 22 % krahasuar me vitin 2024. Brenda kësaj rritje, investimet janë në shumën 2,4 miliardë lekë, ose me rritje 48 %, në raport me planin e buxhetit të këtij viti”, tha ministri Hoxha. a.b
