Ish-deputeti i PD Gerti Bogdani u përcoll me dhimbje këtë mesditë për në banesën e fundit. Një numër i madh qytetarësh, miq e të njohur të Bogdanit kryen homazhe para trupit të tij për rreth 3 orë në ambientet e Kuvendit të Shqipërisë.
Homazhe kreu edhe Presidenti i Republikës, Bajram Begaj. “Ishte një njeri me një jetë të mbushur aktive, qoftë publike, qoftë politike. Ngushëllime familjes!”, tha ai pas nderimit.
Ndërkohë, kryetari i Partisë Demokratike, Sali Berisha, nuk mundi që t’i jepte lamtumirën e fundit ish-deputetit Gert Bogdani për shkak të arrestit shtëpiak. Në emër të familjes Berisha, një mesazh ngushëllimi pas homazhe përcolli bashkëshortja e liderit të PD, Liri Berisha. “Nuk gjej fjalë në këtë dhimbje të madhe të bëj një ngushëllim sepse asgjë nuk ka vlerë në këto momente sesa jeta e atij që iku. Në pozicionin e nënës, dua të ngushëlloj prindërit dhe lutem bashkë me ta të gjejnë forcë për ta kapërcyer këtë dhimbje. Edlirën, para së cilës dalin sot detyra shumë të rënda dhe të vështira për t’i kryer. Ngushëllime të gjithë miqve dhe shokëve me të cilët ai bëri një rrugëtim kaq të shkurtër, por të bukur. Do ta kujtojmë gjithmonë me shumë dashuri, shumë respekt dhe shumë mirësi”, tha Liri Berisha.
Partia Demokratike ka shpallur ditë zie sot, enjte, më datë 19 shtator. Të gjitha aktivitetet e Partisë Demokratike në datat 18 dhe 19 shtator në të gjithë territorin janë anuluar. r.k
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
