Kryeministri Edi Rama kërcënoi sot gjatë fjalës në kongresin e PS, një pjesë të deputetëve të vet se nuk do të jenë në lista për deputet të 2025 për shkak se nuk flasin duke treguar edhe njëherë hipokrizinë e tij, pasi vetë i ka zgjedhur të jenë të tillë, mundësisht injorantë në Kuvend e hajdutë në terren.
“U kërkoj ndjesë për ata deputetë që dalin vetëm për të më shoqëruar mua. Për ata deputetë që u del zëri vetëm për interesa të tyre dhe ata deputetë qysh se kanë zbritur në sallë, flasin njëherë në hënë sikur kanë ardhur në hënë”, tha Rama.
Rama ka pasur parimin e zgjedhjes së deputetëve me ndikim lokal, të tillë si Rrajat, Ndokat e shumë të tjerë, apo propozime të grupeve kriminale si në Shijak, Durrës, Shkodër, Elbasan, Vlorë.
Mendo tani që kjo racë do të bëjë edhe ligjet, sikur janë zgjedhur për atë aftësi.
Në vijim të fjalimit të tij më Kongres, Rama e etiketoi Berishën, pa i përmendur emrin, si fajtorin për gjendjen në të cilën ndodhet Partia Demokratike. E sipas tij, këto probleme në parti janë sjellë edhe në Kuvend.
“Konflikti brutal politik e ka kthyer Parlamentin në shëmbëlltyrën më acaruese për nervat e njerëzve të zakonshëm dhe për këdo që politikën e sheh si një mundësi, për të dëgjuar dhe kuptuar se çfarë ndodh dhe mendojnë ato që janë të përfshirë në arenën e saj, si një mundësi për të bërë opuse të mira bashkë me të tjerët dhe jo për të hedhur helm për të tjerët. Ne mund të kemi plot arsye për të thënë se ai konflikt skandaloz, por ne nuk jemi të pafajshëm, përkundrazi dhe faji unë është se nuk jemi burim i atij konflikti, dihet që burimi është tjetër kush, i njëjti që mori peng sa mundi e kurdo mundi Shqipërinë përmes duarve të mbrapshta shqiptare dhe që tani më e ka katandisur Partinë Demokratike në një cistern të ndryshkur helmi që nuk i bën punë as dreqit të vet, i njëjti që e ndot përditë ajrin e jetës politike, i njëjti që helmon përditë turmën e tkurrur, faji ynë është se ne jo vetëm nuk e kemi bërë dallimin me bartësit e konfliktit me atë parlament të shëmtuar, por kemi bërë të gjithë përpjekjen e duhur për ta bërë të qartë këtë dallim”, tha Rama. a.b
