Kryesia e Kuvendit u mblodh sot në lidhje me një vendimarrje për mandatin e kryetarit të PD, Sali Berisha pas 6 muajsh pa marrë pjesë në punimet e Kuvendit.
Kryetarja e Kuvendit, Lindita Nikolla, ka qënë e vetmja që ka argumentuar lidhur me çështjen.
Nikolla tha se Sali Berishës nuk i mbaron mandati i deputetit nga mosprania në seanca.
“Sali Berisha ka munguar me arsye në parlament për më shumë se 6 muaj ndaj atij nuk i hiqet mandati.
Dua t’i japim fund spekulimeve. Qënia e një personi nën këtë masë nuk mund të konsiderohet si mungesë pa arsye në Kuvend. Jemi konsultuar me njohës të ligjit dhe Kushtetutës”, tha Lindita Nikolla në mbledhjen e kryetarëve.
Kreu u Grupit Parlamentar të Partisë Demokratike, Gazment Bardhi, përshëndeti argumentin duke theksuar se Kryetarja e Kuvedit, këtë herë ka lexuar drejt Kushtetuten sa i përket mandatit të kreut të opozitës, Sali Berisha.
“Strukturat ligjore të kuvendit argumentuan se Sali Berishës nuk i ndërpritet mandati pasi mungesa e tij në kuvend nuk është pa arsye. Kjo i jep fund debatit dhe spekulimeve të sponsorizuara nga segmenete të mazhorancës. Ne kërkuam që zotit Berisha, në përputhje me Kushtetutën t’i krijohet mundësia që të ushtrojë të plotë mandatin e deputetit duke marrë pjesë në seancat parlamentare dhe aktivitetet e tjera parlamentare”, tha Bardhi. a.b
