Sekretariati i Kuvendit shpalli sot të paligjshëm votimin e Kuvendit më 7 mars 2024, duke shënuar kështu për herë të parë konstatimin e veprimeve të paligjshne të Parlamentit.
Sekretariati për Procedurat, Votimet dhe Etikën ka vendosur të pranojë kërkesën e grupit të PD-së duke anuluar votimin e 7 Marsit dhe në këtë mënyrë 5 projekligje do të votohen në një seancë tjetër plenare.
Mes projektligjeve që u votuan në seancën e 7 Marsit ka qenë edhe “projektligji për disa ndryshime në ligjin nr.55/2015 për investimet strategjike në Republikën e Shqipërisë të ndryshuar”, që do të hidhet sërish në votim.
Seanca e 7 Marsit u drejtua nga Ermonela Felaj ndërsa pas seancës, kreu i grupit parlamentar të Partisë Demokratike, Gazment Bardhi, tha se nuk kishte kuorum.
“Deklarohet që janë prezentë 68 deputetë dhe kjo nuk e ndal vrullin e drejtueses së seancës për të miratuar ligjin për investime strategjike”, tha Bardhi atë ditë.
Më 7 mars u votua zgjatja me 1 vit e afatit të ligjit për investimet strategjike, projektligji për “Për burimet ujore”, ndryshimet në ligjin “Për Turizmin”, projektligji për Mbrojtjen e Konkurrencës si dhe disa ndryshime në ligjin “Për arsimin dhe formimin profesional”. a.b
