Presidenti i vendit Bajram Begaj ka provokuar opozitën sot duke e akuzuar atë për mungesë konsensusi dhe debati të qetë.
Ai nuk mundi ta lexonte fjalën e tij në Parlament por e lexoi atë tek zyra e tij.
“Kuvendi është skena e ballafaqimit të ideve, jo arena e luftës ndaj kundërshtarit. Është dora e shtrirë ndaj kompromisit dhe dialogut.
Sesioni i kaluar i Kuvendit, fatkeqësisht, shpenzoi më shumë kohë për agjenda joparlamentare, se sa për çështje madhore për vendin. Koha e humbur në theksimin e ndasive nuk kthehet më.
Ky sesion i ri parlamentar është një mundësi e re për ju deputetë që të ri-orientoni dialogun për të mirën e përbashkët, interesin kombëtar dhe konsolidimin e pozitave të Shqipërisë në rajon, me BE-në dhe aleatin tonë stategjik SHBA.
Ndaj uroj t’i riktheheni bashkëpunimit parlamentar dhe të rigjeni qëllimin e humbur”, tha Begaj.
Në vijim Presidenti tha se nuk presim të shohim në Parlament përplasje fizike ndërsa i trajtoi si të barabartë pozitën dhe opozitën.
“Qytetarët shqiptarë presin të shohin një parlament funksional, dhe jo përplasje fizike në shtëpinë e demokracisë sonë.
Qytetarët shqiptarë presin që ligjvënësit e tyre të bëjnë ligje në interes të vendit që përmirësojnë jetën e tyre dhe japin shpresë për një të ardhme më të mirë. Populli do t’i shohë politikanët duke punuar së bashku për çështje ndërpartiake si: reforma zgjedhore dhe votimi i diasporës. Për reformën në drejtësi ende ka vend për kontribut nga ana e parlamentit”, tha Presidenti në fjalën e tij nga Presidenca. m.k
