Është zhvilluar sot mbledhja e Kryesisë e PD pa praninë e kreut të saj, Sali Berisha e drejtuar nga Sekretari i Përgjithshëm, Flamur Noka.
Që në fillim të mbledhjes Noka tha se lideri historik i demokratëve është i dënuar politik, një skenar sipas tij i Kryeministrit Rama që shkonte përtej asgjësimit të Sali Berishës.
“Ndaj sot PD dhe demokratët janë në luftë me Edi Ramën. Sali Berisha sot është i burgosur politik i Edi Ramës dhe regjimit të tij. Me këtë vendim kriminal, Edi Rama çeli siparin e instalimit defakto të një neodiktature, me këtë akt ai synon të kthejë monizmin dhe të zhdukë opozitën”, tha Noka.
Flamur Noka kërkoi angazhim maksimal nga demokratët ndërsa tha se izolimi i Berishës është një skenar i gatuar më herët nga kryeministri Rama dhe ish-kryetari i demokratëve, Lulzim Basha, duke shtuar këtu edhe SPAK.
“Ka një dallim mes liderëve dhe kryetarëve. Të dytët shkojnë e vijnë, të parët mbeten. SKAP-i po vazhdon misionin politik si organizatë e strukturuar kriminale për të shuar opozitën”, theksoi Noka. r.p
