Me rastin e 110-vjetorit të Pavarësisë Shqipërisë, në Kuvendin e Republikës së Shqipërisë në Tiranë, u zhvillua për herë të parë mbledhja e përbashkët e Kuvendit të Republikës së Kosovës dhe Kuvendit të Republikës së Shqipërisë.
Delegacioni i Kosovës me në krye kryeministrin Albin Kurti është pritur me këngë e valle tradicionale shqiptare para Parlamentit.
Kryetarja e Kuvendit, Lindita Nikolla në fjalën e mbajtur në nisje të mbledhje së përbashkët mes kuvendeve të Shqipërisë dhe Kosovës dha mesazhin për të zhdukur kufijtë mes dy vendeve.
“Sa më e bashkuar bashkësia shqiptare në rajon aq më i qëndrueshëm do jetë rajoni. Shqipëria dhe Kosova si entitet në Ballkan duhet t’i shndërrojmë kufijtë mes dy vendeve në informalë. Për këtë një rol kanë kuvendet tona”, tha Nikolla.
Kryeministri i Kosovës, Albin Kurti në fjalën e tij në mbledhjen e përbashkët të kuvendeve të Kosovës dhe Shqipërisë kërkoi më shumë bashkëpunim mes Kosovës dhe Shqipërisë, jo vetëm në raste festash.
Kurti bëri thirrje që politikanët në të dy anët e kufirit të kenë në prioritet pozitën e Shqipërisë dhe Kosovës në arenën ndërkombëtarë dhe jo ato vetjake.
“Situata nuk është fare rozë, nëse i ndalim përpjekjet rrezikojmë, rrezik është mosveprimi. Vendet tona kanë probleme, nga të cilat më i mprehti është largimi i të rinjve. Shqipëria bëhet, Kosovë bëhet. Puna është rruga jonë, nderi e besa janë cilësitë tona dhe ne do i tregojmë botës se siç po nxjerrim këngëtarë e afaristë të suksesshëm do jemi në gjendje të bëjmë shtetin dhe demokracinë”, tha Kurti në mbledhjen e përbashkët e Kuvendit të Republikës së Kosovës dhe Kuvendit të Republikës së Shqipërisë në Tiranë. a.b
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
