Kryeministri Rama dhe me rradhë edhe ministrat e tij kanë reaguar ashpër sot ndaj protestës së lajmëruar nga opozita me 6 dhjetor, ditën kur liderët evropianë të BE do të zhvillojnë mbledhjen e këshillit në Tiranë.
Reagimi i sinkronizuar tregon se sa dekonspiruese është kjo protestë për raportet proqeveritare të disa ambasadave dhe se sa i trukuar është realiteti i dhimbshëm i Shqipërisë në sytë e tyre.
Rama nuk duron protestën kundër tij dhe kjo e bën edhe më të domosdoshme atë protestë për të kuptuar se tek një qeveri që vjedh nuk duhet kurrfarë mirëkuptimi nga lidershipi evropian, njësoj si do të ndodhte edhe në vendet e tyre.
Më poshtë kemi veçuar dy ministra. Të tjerët janë të njëjtën ligjëratë. m.k
Niko Peleshi, ministri i Mbrojtjes:
Sot, kur Ballkani Perëndimor ka më shumë së kurrë nevojë për mbështetjen e BE dhe SHBA;
Sot, kur Shqipëria po spikat si vendi lider në orientimin e rajonit drejt perëndimit, pa dilema gjeopolitike;
Sot, kur jemi ulur në tryezën e bisedimeve për anëtarësim të plotë në BE;
Sot, në prag të një ngjarjeje historike të paimagjinueshme për nga forca që i jep rrugëtimit tonë europian – samitit të BE në Tiranë,
Sali Berisha thërret protestë kundër BE, në ditën e samitit.
Asgjë më shumë se sa kaq nuk do të bënte edhe Vladimir Putin nëse do të udhëhiqte opozitën shqiptare.
Një dhurate apo një borxh i vjetër ?
Sidoqoftë këtë faturë nuk mund ta paguajë Shqipëria.
Qëndrimi qytetar ndaj këtij turpi është detyrë e gjithsecilit.
Së pari e pjesës së shëndetshme të PD.
Bledi Çuçi, ministër i Brendshëm:
Vetëm një antishqiptar si Sali Berisha, që i do të keqen këtij vendi nga dëshpërimi i non gratës dhe i rublave ruse që i dolën sheshit, kërkon të turpërojë Shqipërinë më 6 dhjetor, ditën kur Tirana mirëpret për herë të parë Samitin e Bashkimit Europian me vendet e Ballkanit Perëndimor. Në grahmat e fundit politike të tij, ky njeri nuk le rast pa tentuar për t’i bërë një tjetër të zezë Shqipërisë, fiks si të ishte një Konsull famëkeq i Vladimir Putinit. Jam i bindur se edhe mbështetësit e Partisë Demokratike, të cilët mund të kenë shumë arsye për të qenë opozitarë me qeverinë, do ta braktisin Sali Berishën në aktin e tij të radhës për t’i lënë Shqipërisë një tjetër damkë turpi në sytë e gjithë botës. Sigurisht që Tirana atë ditë do jetë kryeqyteti më i sigurt, më miqësor dhe më mikpritës i Europës.
