Tirana feston në Bruksel, Rama në konferencën e parë ndërqeveritare. Nisin negociatat për anëtarësim të plotë

Kryeministri Edi Rama tha sot në ditën e hapjes së negociatave dhe takimit të parë ndërqeveritar se Shqipëria ka ecur shunë përpara me kornizën e anëtarësimit.

Kryeministri Rama ndodhet në Bruksel dhe sapo ka mbyllur takimin me Presidenten e Komisionit Evropian Ursula von der Leyen, ndërsa po jep një konferencë shtypi.

“Ajo që ka shumë rendësi të thuhet sot, është që në ndërkohë siç e kemi thënë më parë, ne nuk kemi humbur kohë, nuk kemi pritur të fillojnë formalisht negociatat për të shkuar më tutje, njësoj sikur negociatat të ishin hapur. Kjo është edhe arsyeja pse sot Shqipëria jo vetëm hyn në katërshen e vendeve të Ballkanit Perëndimor që negociojnë për anëtarësim, por në aspektin më të rëndësishëm të këtij procesi që është rendi ligjor dhe drejtësia jemi në pararojë të të gjithëve”, tha Rama.

Konferenca e parë Ndërqeveritare që zhvillohet sot në Bruksel nis zyrtarisht edhe bisedimet për anëtarësim të një vendi në Bashkimin Evropian. Në konferencë mblidhen përfaqësues të qeverisë dhe përcaktohen kornizat themelore. Këto korniza përcaktojnë udhëzimet dhe parimet që rregullojnë negociatat e anëtarësimit me çdo vend kandidat. Komisioni do të fillojë menjëherë punën e nevojshme përgatitore.

Negociatat zhvillohen midis ministrive dhe ambasadorëve të qeverive të BE-së dhe vendit kandidat në atë që quhet konferencë ndërqeveritare.

Faza e parë përfshin shqyrtimin rigoroz të legjislacionit të vendit kandidat; negociatat pastaj vazhdojnë në mënyrë metodike përmes një sërë legjislacioni të BE-së, të cilin vendi kandidat duhet të miratojë dhe zbatojë. Negociatat shtrihen edhe në të drejta dhe detyrime të tjera që të gjitha Shtetet Anëtare duhet të pranojnë – këto njihen si Community acquis.

Negociatat e anëtarësimit duhet të përfundojnë përpara se një shtet i ri anëtar të mund të anëtarësohet në Bashkimin Evropian. Negociatat e anëtarësimit janë aktualisht në vazhdim me Malin e Zi, Serbinë dhe Turqinë. Negociatat janë hapur edhe me Islandën, por aktualisht janë në pritje.

/DRONI.al/