Batuta e kryeministrit Rama, ku ironizon veton e pakuptimtë të Bullgarisë për çeljen e negociatave për Maqedoninë e Veriut, pasi vite më parë u bllokua nga Greqia e cila e detyroi të ndryshonte emrin e saj, ka ngjallur reagime në shtetin fqinj. Aq sa opozita nuk ka ngurruar të kërkojë dhe dorëheqjen e kryeministrit Kovaceski, pasi e qeshura e tij dhe moskërkimi i faljes nga kryeministri shqiptar për këtë batutë në prani të kancelarit gjerman dhe kryeministrit grek, është për ta miratim i shitjes së identitetit kombëtar.
“Kjo sjellje e Kovaceskit është e turpshme dhe e mjerë. Për një fyerje të tillë të vendit të vet, ai jo vetëm që detyrohet të kërkojë falje, por dhe të ofrojë dorëheqjen si akt përgjegjësie për turpin e shkaktuar në skenën ndërkombëtare”
Por kryeministri Rama e cilëson histeri tragjiko-komike reagimin në Shkup dhe sqaron ku donte të godiste me batutën e tij.
“Për të qeshur dhe qarë histeria e disave në Shkup ndaj kryeministrit Kovaçevski, pas publikimit të videos së duarshtrëngimeve me Kancelarin Scholz në Selanik, ku ironizova bllokadën e shëmtuar ndaj Maqedonisë së Veriut nga ana e Bullgarisë! Sherr mejhaneje mes tymit të qofteve”
Nuk është hera e parë që kryeministri shqiptar edhe në krah të ndërkombëtarëve por dhe homologëve të tij të rajonit ka ironizuar bllokimin që Bullgaria po i bën Maqedonisë së Veriut dhe si pasojë dhe vendit tonë me veton në Këshillin Europian për çeljen e negociatave. Tvklan
