Presidenti ukrainas Volodymyr Zelensky tha se fitoret ushtarake ruse në pjesë të Ukrainës lindore janë “shumë të përkohshme” dhe çdo territor që ata kanë pretenduar do t’i kthehet Ukrainës.
Ai tha se vendi i tij do të kishte më shumë luftime të përgjakshme, por theksoi se vetëm diplomacia mund t’i japë fund luftës.
Në lidhje me fushatën e Rusisë, ai tha: “Për ta, të gjitha këto fitore okupimi i Krimesë apo Donbasit është shumë i përkohshëm. Të gjitha do të kthehen pasi ky është territori ynë.”
Ndërkaq Zelensky kërkon krijimin e një fondi kompensimi nga Rusia. Ai propozoi gjatë një video-mesazhi krijimin e një fondi për të kompensuar shtetet e sulmuara nga Rusia.
Zelensky tha se vendet partnere duhet të zhvillojnë së bashku një mekanizëm në mënyrë që “të gjithë ata që kanë vuajtur nga veprimet e Rusisë” të marrin kompensim për humbjet e tyre”. Kjo mund të rregullohet përmes një marrëveshjeje shumëpalëshe.
Për krijimin e këtij fondi Presidenti ukranas propozoi ngrirjen e kapitalit dhe pronave ruse jashtë vendit dhe transferimin e tyre në këtë fond. “Një hap i tillë është i drejtë,” tha ai, sepse kështu Rusia do të “ndiejë peshën e vërtetë të çdo rakete, të çdo bombe, të çdo predhe”. Ushtria ruse e sulmoi vendin fqinj tre muaj më parë. Sipas vlerësimeve, dëmet e luftës në Ukrainë kanë shkruar tashmë në disa qindra miliardë euro.
Presidenti ukrainas ka alarmuar në lidhje me bllokimin nga Rusia të eksporteve të drithrave nga Ukraina. Volodymyr Zelensky ka zhvilluar pak kohë më parë një takim me kryeministrin portugez Antonio Costa.
Pas atij takimi ai tha se ka 22 milionë tonë ushqime të ngecur në portet e Ukrainës dhe zgjidhje të ndryshme janë duke u shqyrtuar për të zgjidhur këtë çështje.
Agjencia e lajmeve Interfax, Ukraine e citoi atë duke thënë se Rusia kishte bllokuar “të gjitha opsionet e detit për eksportimin e produkteve ushqimore” dhe se Rusia “po e vidhte atë në heshtje”.
“Gruri po dërgohet diku tjetër. Ne e dimë se ku është ai diku tjetër,” tha Zelensky.
Ai shtoi se portet mund të zhbllokohen me mjete ushtarake dhe kjo ishte arsyeja pse Ukraina po bënte thirrje për armë nga aleatët.
