Nga Genc Caushi
Nëse analistët perëndimorë kanë të drejtë që Putini ka kërkuar fitore në Ditën e Fitores, kjo do të thotë se gjeneralet rus duhet të arrijnë diçka pas disfatave poshtëruese në dy muajt e parë të luftës. 9 maji është një festë e rendesishme në kalendarin rus, një ditë kur vendi feston kapitullimin e gjermanisë naziste në Luftën e Dytë Botërore me paradë të madhe trupash dhe armatimi në Sheshin e Kuq. Analistët thonë se Putin dëshiron të jetë në gjendje të festojë dicka të ngjashme me fitoren për luftën e tij ne Ukraine atë ditë. Por pushtimi rus nuk ka shkuar sipas parashikimeve të Putinit. Përpjekja për të marrë Kievin dështoj, kryqëzori kryesor i flotës ruse “Moskva” u fundos, ruset kanë humbur të paktën 15,000 ushtarë, (burimet ukrainase thone 23,000 ushtare) shumë më tepër se në të gjitha fushatat e mëparshme post-sovjetike se në Ceçeni, Gjeorgji, Siri, të kombinuara. Ndërsa agresionit rus në Ukrainë ka hyre ne ditën e 68, Moska tashme e ka rishikuar strategjinë e saj të luftës dhe ështe fokusuar në përpjekjen për të marrë kontrollin e Donbasit dhe rajoneve të tjera në Ukrainën lindore, sipas vlerësimet të inteligjencës amerikane, dhe kjo është më e mira që Putin mund të bëjë dhe ende ofron një lloj ngjashmerie të një narrative të suksesshme për popullin rus. Dhe me kete pikesynim Rusia ka rritur tempin e ofensivës së saj në Ukrainën lindore dhe jugore dhe qyteti strategjik i Mariupolit qëkonsiderohet si ura mbi toke për rusët nga Dombasi në Krime, pothuaje se eshtë nën pushtim rus me perjashtim të një xhepi tëvogël rezistence qe vjen nga fabrika e çelikut AZOVSTAL,dhe kjo situate në terren pranohet edhe nga zyrtaret e Kievit. Rusia e aneksoi rajonin e Krimesë në Ukrainë në vitin 2014. Keshtu një kalim i kontrolluar nga Rusia në jug-perëndim përgjatë bregut të Detit Azov nga Mariupol në Krime i siguron Moskës një fleksibilitet më të madh në ofensivën e saj në Donbas. Pra sic konfirmohet edhe gjeografikisht Plani B i Rusisë është dyfishimi i përpjekjeve dhe forcat tokësore dhe fokusimi në marrjen e më shumë territoreve në lindje të Ukrainës, dhe duke shpresuar, por me pak gjasa, pjesëntjetër te bregut të Detit të Zi. Nëse kjo mund të bëhet në kohë për paradën e 9 majit është shumë e diskutueshme. Ukrainasit po marrin armatim të rëndë dhe morali është i lartë. Së fundmi edhe disa vende te NATOs qëhezitonin të dërgonin tanke, topa apo pajisje te tjera ushtarake për forcat ukrainase, tashme e kane kaluar këtë fazë. Pese dite me pare Gjermania tha se do të dërgojë në Kiev 50 tanke Gepard me sisteme kunder-ajrore, duke shënuar një ndryshim të rëndësishëm të politikës së Berlinit. Ndërsa vetëm Shtetet e Bashkuara që sic u shpreh Presidenti ukrainas Volodymyr Zelenskyy në takimin me Nancy Pelosi, Kryetarja e Kongresit Amerikan, te shtunën në Kiev, “janë liderët në mbeshtetjen e luftës së Ukrainës ndaj agresionit rus” kane dhene miliard dollar ndihme per ish vendin Sovjetik. Kështu Presidenti Joe Biden javën e kaluar i ka kerkuar Kongresit te miratojë sa me shpejt te jete e mundur një paketë gjigante ndihme ushtarake dhe ekonomike prej 33 miliardë dollarësh për Ukrainën, duke e dyfishuar nivelin e ndihmës së SHBA-së deri më tani. Kërkesa e presidentit Biden përfshin mbi 20 miliardë dollarë ndihmë ushtarake, 8.5 miliardë dollarë ndihmë ekonomike për Kievin dhe 3 miliardë dollarë ndihmë humanitare. Me ndihmat ushtarake qe rrjedhin drejt Ukraines, me lumin e sanksioneve nga Bashkimi Europian, vendet e G7 apo shtete te tjera, Moskes po i goditen rëndë financat dhe me kalimin e muajve kjo mund të diktojë një ndryshim eventual të politikës, por jo deri më 9 maj. Asnjë nga këto ndryshime nuk do të jetë i dukshëm deri atëherë dhe Putin do të ketë një paradë fitoreje më 9 maj, pavarësisht statusit të luftës, por edhe nëse ka një festë ruse, një fitore aktuale është larg.
