Shtatë civilë u vranë sot pasi forcat ruse sulmuan një autokolonë evakuimi pranë Kievit, sipas agjencisë inteligjente ukrainase.
Në mesin e viktimave ishte një fëmijë, dhe autokolona, me njerëz nga fshati Peremoha, përbëhej ekskluzivisht nga gra dhe fëmijë.
”Pas sulmit, pushtuesit i detyruan mbetjet e kolonës të kthehen në Peremoha dhe nuk po i lënë të dalin nga fshati”, thuhet në deklaratën e sherbimit inteligjent.
“Forcat e armatosura ruse kanë rrethuar qytetet ukrainase dhe duan t’i shkatërrojnë.
Ata bombardojnë 24 orë në ditë, bombardojnë klinikat, kishat, sheshet që janë si tuajat”, deklaroi presidenti i Ukrainës, Volodymyr Zelenskyj, gjatë një deklarate online në një forum të mbajtur në Itali.
Ndërkaq Vladimir Putin mbetet i vendosur për të arritur objektivin e tij në Ukrainë. Ky është rezultati pas telefonatës së ditës së sotme midis presidentit francez Emmanuel Macron, kancelarit gjerman Olaf Scholz dhe Putinit.
Të tre liderët kanë folur për herë të fundit të enjten, ku Vladimir Putin dukej se ishte i vendosur për të arritur objektivat e tij në Ukrainë, por fakti që ai vazhdon të flasë me liderët francezë dhe gjermanë tregon se ai nuk e përjashton as mundësinë e një zgjidhjeje diplomatike në tërësi, transmeton CNN.
Ndërkaq, më herët ditën e sotme, presidenti ukrainas Volodymyr Zelensky i kërkoi Macronit që të ushtrojë presion ndaj Putinit për një armëpushim dhe të ngrejë çështjen e rrëmbimit të kryebashkiakut të Melitopolit.
“U diskutua për një armëpushim të menjëhershëm, për fillimin e negociatave në tre pika: çështjet në lidhje me sigurinë, ato që lidhen me sovranitetin ukrainas dhe së treti, ato çështje të ngritura nga Ukraina dhe Rusia kohët e fundit” , transmeton CNN.
