Peshkatarët irlandezë morën një fitore të rëndësishme në betejën e tyre kundër Marinës ruse, që pretendonte të zhvillonte stërvitje ushtarake brenda zonës ekskluzive ekonomike të ishullit.
Pas kërcënimit të peshkatarëve që do të pengonin zhvillimin e stërvitjes në jugperëndim të Irlandës, Kremlini më në fund u tërhoq. Ambasadori rus në Dublin, Yury Filatov, tha se Rusia po tërhiqej në shenjë “mirësjelljeje”.
Vendimi i Rusisë u mor pasi peshkatarët irlandezë thanë se do të dërgonin 60 varka peshkimi mes anijeve luftarake ruse, për të penguar zhvillimin e stërvitjes. Fillimisht, ambasadori tha se stërvitja ushtarake do të ndodhte 200 kilometra larg qytetit Kork dhe nuk kishte dijeni se do të lëshoheshin predha. Por peshkatarët thanë se ajo zonë është e mbushur me rreth 500 milionë tonë merluc, që do të largohej prej aty nga tronditja e shpërthimeve.
Vendimi për t’u tërhequr u përshëndet nga Shoqata Irlandeze e Përpunuesve dhe Eksportuesve të Peshkut dhe u mirëprit nga ministri i Jashtëm irlandez, Simon Coveney.
E gjithë situata mori edhe më shumë vëmendje për shkak të tensioneve mes Rusisë dhe Perëndimit, si dhe alarmit për një pushtim të mundshëm të Ukrainës nga ana e Moskës. Rusia i hedh poshtë akuzat se po planifikon të futet në Ukrainë, por kërkon që vendi fqinj të mos anëtarësohet në NATO, kërkesë e hedhur poshtë nga SHBA-ja dhe Aleanca e Atlantikut Verior.
