Presidenti i Turqisë Recep Tayyip Erdogan lajmëroi sonte hapjen e xhamisë së madhe të Namazgjasë brenda pak muajve.
Sipas Erdogan deri në muajin e Ramazanit, që fillon më 2 prill dhe përfundon më 1 maj, shpreson që të jenë zgjidhur problemet për xhaminë e Namazgjasë dhe më pas të mund të hapet.
Erdogan i cili është edhe financuesi i ndërtimit të xhamisë tha se pret që deri atëherë të hidhen hapa konkretë sipas tij kundër “Lëvizjes Gulen” në vendin tonë.
“Besoj se xhamia jonë e Ethem Beut përveçse reflekton një bukuri ditës, por edhe me ndriçimin e jashtëm që është instaluar do japë një pamje magjepse dhe fantastike për këdo që e shikon këtë xhami. Uroj dhe dëshiroj që shumë shpejt mbase deri në muajin e Ramazanit ta kemi zgjidhur edhe problemin e xhamisë së ‘Namazgjasë”, tha Erdogan.
Presidenti turk kërkoi edhe në Parlament që Shqipëria të shkatërronte organizatën Feto e cila zotëron disa shkolla, universitet, media, spitale në Tiranë por edhe biznese të tjera.
Presidenti turk vizitoi sot Shqipërinë duke ngritur një varg hamendjesh pse erdhi pikërisht në përvjetorin e vdekjes së Skënderbeut. Ndërkohë ai pati edhe një axhendë të njëanshme politike duke anashkaluar Presidentin e Shqipërisë. m.k
