Departamenti i Thesarit të SHBA-së për Kontrollin e Pasurive të Huaja (OFAC) lajmëroi sanksione ndaj liderit të serbëve të Bosnjes dhe anëtarin e Presidencës së Bosnjë dhe Hercegovinës, Milorad Dodik.
Sipas Thesarit, ai akuzohet për aktivitete destabilizuese dhe korruptive, të cilat minuan për 26 vjet progresin që nga Marrëveshja e Paqes së Dejtonit.
“Dodik ka minuar institucionet e BiH duke bërë thirrje për kapjen e kompetencave shtetërore dhe duke vënë në lëvizje krijimin e institucioneve paralele në njësinë Republika Srpska (RS) të BiH. Për më tepër, Dodik ka përdorur pozicionin e tij zyrtar në BiH për të grumbulluar pasuri personale nëpërmjet ryshfetit dhe formave të tjera të korrupsionit. Retorika e tij përçarëse etno-nacionaliste pasqyron përpjekjet e tij për të çuar përpara këto synime politike dhe për të shkëputur vëmendjen nga aktivitetet e tij korruptive. Këto veprime kërcënojnë stabilitetin, sovranitetin dhe integritetin territorial të BiH dhe minojnë Marrëveshjet e Paqes të Dejtonit”, sipas njoftimit të Departamentit të Thesarit të SHBA-së për Kontrollin e Pasurive të Huaja (OFAC).
“Aktivitetet korruptive destabilizuese të Milorad Dodik dhe përpjekjet për të çmontuar Marrëveshjen e Paqes të Dejtonit, të motivuara nga interesi i tij vetjak, kërcënojnë stabilitetin e Bosnjë dhe Hercegovinës dhe të gjithë rajonit. Shtetet e Bashkuara nuk do të hezitojnë të veprojnë kundër atyre që ndjekin korrupsionin, destabilizimin dhe ndarjen në kurriz të popullit të tyre, si dhe kundër atyre që mundësojnë dhe lehtësojnë këtë sjellje“, tha nënsekretari i Thesarit për Terrorizmin dhe Inteligjencën Financiare, Brian E. Nelson.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
