Në Tiranë po mbrohet ozoni, çfarë bënë të rinjtë në ditën ndërkombëtare

Tiranë, 16 shtator 2021 – Në Ditën Ndërkombëtare të Kombeve të Bashkuara për Mbrojtjen e Shtresës së Ozonit në vende të ndryshme të botës zhvillohen veprimtari, publikohen dhe shpërndahen mesazhe informimi dhe ndërgjegjësimi për qytetarët dhe institucionet publike.

Njësia Kombëtare e Ozonit në Shqipëri po organizon dhe po mbështet aktivitete të ndryshme për të shënuar këtë ditë ndërkombëtare, në përkujtim të datës së nënshkrimit të Protokollit të Montrealit “Mbi substancat Ozonholluese”.

Një bashkëbisedim me nxënës të shkollave 9-vjeçare u zhvillua në mjediset e Europe House në Tiranë, ku ekspertë të fushës ndanë me ta informacione të dobishme mbi mbrojtjen e shtresës së ozonit dhe efektet e ngrohjes globale.

Njohuritë që marrin nxënësit mbi këto problematika që sot trajtohen në nivel global, ndihmojnë në edukimin e tyre si kontributorët e ardhshëm në shoqëri. Për një rol më proaktiv në diskutimet publike dhe vendimarrjet në dobi të komunitetit.

ABC Tirana Club ka organizuar në kuadër të Ditës Ndërkombëtare për mbrojtjen e shtresës së ozonit dhe një ekspozitë pikture, që është edicioni i dytë i projektit “Qyteti im Evropian”.

‘Qyteti im evropian” është një format projekti artistik, që prezanton kryesisht krijime në pikturë, në qytete të ndryshme të vendit, si një kontribut i lirë i nxënësve, shprehje përmes gjuhës së krijimit mbi konceptin dhe ëndrrën e tyre mbi qytetin ku ata banojnë.

“Qyteti im evropian” synon të nxisë talentin dhe shprehitë artistike mes fëmijëve, mbi atë se si ata e mendojnë qytetin me mjedise të jetueshme, me mjedise të gjelbërta, me hapësira të bollshme, ku ata mund të luajnë, të argëtohen, pra ta kalojnë sa më mirë kohën e lirë me bashkëmoshtarët e tyre.

End

/DRONI.al/