BKH rikthen në garë kandidatin pasi e skualifikoi

Byroja Kombëtare e Hetimit ka reaguar lidhur me akuzat për skualifikimin e një kandidati në mënyrë të padrejtë.

Nëpërmjet një postimi të bërë në faqen zyrtare BKH-ja thotë se ka rishikuar përgjigjet, nga ku rezultoi se një kandidat është shkualifikuar padrejtësisht.

BKH njofton se pasi mori disa ankesa prej kandidatëve ka bërë rishikimin e të gjithë dokumentacionit të kandidatëve që morën pjesë në testin e aftësive fizike.

Reagimi i plotë:

Komisioni i Përzgjedhjes me qëllim përmbushjen në mënyrë të saktë, të drejtë dhe transparente të detyrave që vijnë me rolin e tij në procesin e rekrutimit të hetuesve të BKH-së,  si dhe pasi mori disa ankesa prej kandidatëve, ka kryer rishikimin e të gjithë dokumentacionit të kandidatëve të cilët morën pjesë në testin e aftësive fizike.

Prej këtij rishikimi të dytë të proces-verbaleve rezultoi se, si pasojë e një gabimi njerëzor, një kandidat i vlerësuar me pikë të mjaftueshme kualifikuese është vendosur gabimisht në listën e të skualifikuarve në programin Excel gjatë përpunimit të të dhënave prej Sekretarisë Teknike. Si pasojë, kandidati nuk është ftuar në fazën tjetër të rekrutimit. Në këto kushte, dhe në përputhje me parashikimet e Rregullores, kandidati i përmendur më lart i nënshtrohet Testit të Shkrimit të Esesë. Të gjitha rezultatet e tjera janë konfirmuar të sakta.

Rregullorja në fuqi, e miratuar prej BKH-së, parashikon rregulla të qarta dhe të detajuara për vlerësimin e kandidatëve për hetues në BKH. Komisioni i Përzgjedhjes është tërësisht i angazhuar të zbatojë kërkesat e Rregullores nëpërmjet një procesi të drejtë dhe transparent. Të gjithë hapat e procesit të rekrutimit po monitorohen prej një Komisioni Ndërkombëtar për të siguruar ruajtjen e standardeve me të larta.

Gjithashtu, për çdo aplikant apo këdo që mbetet i paqartë mbi procesin e vlerësimit, Rregullorja për përcaktimin e procedurave të rekrutimit të hetuesve të Byrosë Kombëtare të Hetimit gjendet e publikuar më poshtë.

e.h/DRONI.al/

/DRONI.al/